Dibang Multipurpose Project atan MoU ziak

National Hydro Power Corporation (NHPC) chuan Arunachal Pradesh-a Dibang Multipurpose project (2880 MW) thawhna turah Cement Corporation of India Limited (CCI) chu inrem­na, memorandum of under­standing (MoU) a ziahpui.

MoU hi NHPC chairman and managing director AK Singh leh CCI chairman and managing director BVN Prasad-ten Faridabad-a NHPC corporate office-ah an ziak a ni. Inremna an siam hmang hian project thawhna tura cement mamawhte chu CCI lam hian a tum dawn a ni. CCI hian project area bulah clinker grinding unit siam a rawt a, hei hian he hna thawhna biala chengte tan hna a siamsak thei dawn bawk tih a sawi. 

Cabinet Committee on Economic Affairs (CCEA) chuan nikum khan Lower Dibang Valley district-a Dibang Multipurpose project thawhna tura pre-investment tihna turin cheng vaibelchhe 1,600 a lo pawm tawh a ni. Kum 2018 June price level aṭanga an chhutin, he project pumpui zawhfelna tur hian cheng vaibelchhe  28,080.35 chhut a ni. 

2880 MW hydropower project hi India rama hydro electric project lian ber tur a ni. Dam hi meter 278-a sangah siam niin, zawh a nih hunah India rama dam sang ber a ni ang. Arunachal Pradesh chuan he project aṭanga power siamchhuah 12% chu a thlawnin a dawng dawn a, Local Area Develop­ment Fund (LADF) hnenah 1% pek a ni bawk ang. Arunchal Pradesh-in a thlawna power a dawn tur leh, LADF hnena pek tur te hlut zawng hi project hman chhung, kum 40 chhungin cheng vaibelchhe 26,785 a tling dawn a ni.