Chuhvel hnaihah Assam an indah belh; Mizoram police-te awmna tur sak a ni

Mamit district-a Chuhvel khaw ram, Assam lamin an rawn chuh avanga buaina kal zelah Assam lam chu an ram chinah police/sipai an inchhawp belh zel a; hetihlai hian Mizoram lam pawh an inkulh nghet zel a, nimin khan Taitesena Group YMA rua­hmannain police-te awmna tur bûk sak a ni.

Nimina Chuhvel ram tlawhtu Vanglaini palai thu dawn danin, Assam lam hian July 14, Nilaini tlai dar 3 vela Mizoram police-te awmna bula an kal bak thâwm an nei chhunzawm rih lo a, mahse, Gurguthi border outpost (BOP)-ah an inchhawp belh zel nia hriat a ni. Gurguthi BOP hi Chuhvel ram epa awm a ni a, tun hma chuan police tlem azawng awm ṭhinin, tun hnaiah buaina awm avangin an inchhawp belh a ni.

Assam lamin Chuhvel rama kawng laihna tur an sâm fai hnuah Mizoram police-te chuan hmun ṭha ber nia hriat Bilpadawk rama K Lalengmawia, Chuhvel khaw huanah awm hmun an khuar a; chu chu Assam lamin an ram china an chhàl aṭanga km. 2 vel a ni a, tlang pali làwn liam ngai a ni thung.

Chuhvel rama Mizoram police awm mekte chuan ṭanhmun an khuarna chu ṭha tâwka an hriat thu an sawi a, "Engtin nge Assam lamin chêt an lak dawn kan hre lo. An chêt vel danah an reh hlen erawh a rinawm loh," an ti.

Police-te'n tun dinhmuna harsatna an tawh lian ber chu tui leh kawlphetha (êng) a ni a, silpauline hmangin ruahtui an dawh a, chu chu an rinpui ber niin, metre 800 velah tui chàwi tur a awm. Tui hi pump chhoh a harsat an rin loh thu nimina hnatlanga thawk chhuakte chuan Vanglaini an hrilh.

Vanglaini palai zawhna chhangin K Lalengmawia chuan, a huan piah lamah chuan an khaw mi huan nei an awm a hriat loh thu a sawi a, "Mizoram chin erawh eng emaw chen a la ni," tiin, Mizoram chinah chuan Assam-in hma an la tawh loa an hriat thu a sawi.

K Lalengmawia rama Mizoram police-te an awm ṭan ni, July 13, 2021 aṭangin Chuhvel khaw mipuite chu police-te awmna tur sain an la hnatlang ziah a; nimin khan Taitesena Group YMA huaihawtin police-te awmna tur sak hnatlang neih leh niin, mi 250 vel an thawk chhuak a, mau leh silpauline hmangin sak a ni. In sak tharah hian police-te an la leng lo thung.

Mizoram police-te awmna hmun hi Chuhvel khaw chhung aṭangin km. 4 vela hlá a ni a, km. 2 vel thleng link road awm mah se, kawng a ṭhat tâwk loh vang leh a nâl avangin lirthei a lut ṭha thei lo a ni.