Covid-19 kaihhnawiha Mizoram dinhmun Sorkar laipui mithiamte'n an enfiah mek

Mizoramah Covid-19 léng dinhmun zir chiang turin July 14, Nilaini khan sorkar laipui aṭangin expert team an rawn thleng. Nilaini khan Health minister Dr R Lalthangliana an kawm bakah, nimin khan Zoram Medical College an tlawh.

Central Team of Experts rawn kalte hi mi pahnih - Dr Vinita Gupta, epidemiologist leh Dr Shiva Kumar Chimtla, chest physician-te an ni a; ni sarih Mizorama an chàm chhungin Covid-19 chungchang leh a kaihhnawih thilte an zir chiang dawn a, July 20, 2021-ah Mizoram an chhuahsan leh ang.

Nilaini tlaia Health Minister pisaa inkawmnaah hian Health secretary R Lalramnghaka, NHM mission director Eric Zomawia, IDSP nodal officer Dr Pachuau Lalmalsawma leh Health department hotute an tel a ni.

Expert team-te hian Mizoramin hripui léng a donaa hma a lakna hrang hrang - swab sample endik dan, sûlhnu chhui dan, containment zone kalpui dan, mipui nunphung, damdawi-in hrang hrangte inbuatsaih dan leh thil pawimawh dangte an enfiah dawn a; an hmuh dan, zirchianna report leh rawtna an neihte chu Mizoram sorkar hotute nen an sawiho dawn bakah, sorkar laipuiah an thlen dawn a ni.

Nimin khan ZMC an tlawh a, SRH-ZMC-a hripui vei damlote enkawl dan, damdawi-in dinhmun, oxygen siamna hmun, ZMC RT-PCR laboratory, damlote dinhmun leh thil pawimawh dangte an enfiah.

Expert team kaihruaitu liaison officer Dr Zorinsangi chuan, central mithiamte hian SRH-ZMC ICU-a damlo enkawl dan bakah, hmun hrang hrang an enfiah tih a sawi a; SRH medical superintendent Dr HC Laldina leh a thawhpuite kâwmin thil chi hrang hrang an sawiho bakah, contact tracing team-te an kâwm tih a sawi bawk.