Covid vaccine pekah Mizoram parukna

Health minister Dr R Lalthangliana hoin nimin khan Secretariat conference hall-ah Covid-19 veite enkawlna hmun aṭanga chhuahtir hun leh chhuahtir dan tur chungchang sawiho a ni. Covid-19 vaccine pekah Mizoram chu India rama state leh union territory zinga a ti ṭha ber parukna a nih thu an tarlang.

Ṭhutkhawma an tarlan danin, Covid-19 vaccine pek kawnga hma la ṭha ber chu Dadra & Nagar Haveli and Daman & Diu an ni a; Ladakh, Sikkim, Lakshadweep, Goa leh Mizoram ten an dawt.

Meeting-ah hian hripui vei hnua fihlim tawhte chhuahtir chungchangah rawtna chi hrang hrang an siam a, chu'ngte chu sorkarin a ṭul angin a bawhzui dawn a ni.

Doctor-te inràwn­khawmna Joint Con-sultation Meeting (JCM) aiawhte chuan, Mizorama Covid-19 vei zingah symptom nei tawh lo leh symptom nei mang lote rei tak khung reng chuan rilru leh hriselna a nghawng thei tih an sawi.

JCM aiawhte chuan, "Covid-19 hi hri chhuak thar a nih avangin a nihphung zir chhoh zel a ni a, a tìr lama kan hmuh dan leh hriat dan te, enkawl dan leh enkawlna hmun aṭanga chhuahtir dante pawh mithiamte'n an zir chian zel hnuah thlak danglam a ni," an ti.

Covid discharge kalphung atana rawtna tharah chuan, India ram hmun dang leh khawvel ram hrang hranga an kalpui angin, natna lang chhuak lo (asymptomatic) leh natna lang chhuak nasa lo (mild symptomatic)-te chu hripui an vei tih hmuh chhuah aṭanga ni 10 chhung uluk taka vil an ni ang a; ni 7-10 inkar chhunga khawsik an neih loh chuan ni 10-naah swab test loin chhuahtir tur an ni. An chhuah hnuah in lamah uluk taka inchîk chungin nunphung pangngaiin an awm thei ang.

Covid-19 inkai chhâwnna chhut chah kawngah hmalak mek dante sawiho a ni a, rawtna hrang hrang sawi chhuah niin, sawt leh awmze nei zawka kalpui dan tur ruahman tum a ni. Tarlan danin, July 14, Thawhlehni thleng khan Mizoramah Covid-19 vaccine dose 7,01,646 pek a ni tawh a, dose la kim tawh mi 1,09,868 an awm. Electoral roll thar ber aṭanga chhûtin, Mizoramah vaccine la thei (kum 18 chung lam) mi 7,75,106 an awm a, chuta ṭanga chhût chuan mi 76% hnenah vaccine pek tawh a ni.