KHAWTHLIR

SOP pawtsei
Mizoram sorkar chuan Covid-19 hripui lêng avanga inkhuahkhirhna leh inkaihhruaina hman mek chu July 17, Inrinni zanlai dar 11:59 thleng hman turin a pawtsei. Inkaihhruaina hman mek hi nizan zanlaia tawp tur a ni.

Thisen pe
Kolasib Khuangpuilam Branch YMA hnuaia Vanapa Section chuan nimin khan District Hospital Blood Bank-ah thisen unit kua an pe a, petute mipa pariat leh hmeichhia pakhat an ni.

Medical course
Higher & Technical Education (Technical Wing) chuan Mizoram quota-a MBBS, BDS, BAMS, BASLP zir tumte tan August 6, 2021 thleng NTA website (neet.nta.nic.in/)-ah registration tih theih a nih thu an tarlang. Harsatna nei tan HTE Technical Wing, Chaltlang Lily Veng leh veng hrang hranga CSC-te pan theih a nih thu a tarlang bawk. Form hi dhte.mizoram.gov.in/ ah download theih a ni.

Containment zone
Chanmari West-a hmun ṭhenkhat chu July 14, Nilaini zan khan Aizawl DC-in containment zone-ah a puang a, a huam chhungah chhungkaw 125 an awm. TNT (Muanna Veng), Bethlehem Veng, Ramhlun 'N' leh College Venga hmun ṭhenkhat, containment zone-a puan tawh a hlih a ni thung a, hmun ṭhenkhat containment zone la ni zui zel a awm bawk.

CM Relief Fund

Chief Minister's Relief Fund for Covid-19 ah nimin tlai thleng khan Rs. 29,18,62,678 a lut tawh a; Rs. 25,31,14,470 hman tawh niin, la hman loh Rs. 3,87,48,208 a la awm. CMRF for Covid-ah hian nimin khan Zarkawt Presbyterian Kohhranin Rs. 1,00,000 an chhûng lut a ni.

ICU-ah mi 31 awm
Nimin tlai dar 5 dinhmun angin, SRH-ZMC-ah Covid-19 vei mi 264 enkawl mek an ni a, chu'ng zinga mi 31 chu ICU-ah enkawl niin, mi 16 chu ventilator hmanga enkawl an ni. Ward hrang hrangah mi 233 an awm a, an zinga mi 69 chu oxygen pek mek an ni. Nimin khan mi 40 dah luh an ni a, mi 16 chhuahtir an ni thung.

Hmanrua hlân
BJP Mizoram Pradesh chuan nimin khan YMA, Vanapa Group hnenah oxygen concentrator, PPE leh health & hygiene hmanrua eng emaw zat a pe. Bungruate chu sorkar laipui aṭanga an chah a ni a, Hnahlan khuaah Vanapa Group YMA President hnenah BJP president Vanlalhmuaka'n a hlan a ni.

Zirlai chawimawi
YMA Sub-Headquarters, Kolasib chuan nimin khan kumin HSLC leh HSSLC exam-a Kolasib district-a ti ṭha mi pasarihte chawimawina hun an buatsaih a, bawrhsap Dr H Lalthlangliana, District Education Committee chairman ni bawkin a hmanpui.

Ram sawiho
Hnahthial bawrhsap H Dolianbuaia hoin nimin khan Hnahthial khawpuia sorkar pisa hrang hrang hotute an ṭhukhawm a; Hnahthial district tihchangtlun zelna tura ram mamawhte leh Government Land Pooling System chungchang an sawiho. Sorkar ram chu sorkar agency tan lo chuan pek phal a nih loh thu tarlan a ni.