Mizorama Covid-19 hluar chhana CM-in ráltlânte a puh hi a pawi - Congress

Mizoram Pradesh Congress Commit­tee (MPCC) chuan, July 13, 2021-a Prime Minister hoa hmarchhak state chief minister-te'n Covid-19 chungchang an sawihonaah, chief minister Zoramthanga'n Mizoramah hripui hluar chhanah ráltlân an tam vanga a puh chu pawi an tih thu an tarlang.

MPCC thuchhuah chuan, "State ṭhenkhatin an state chhunga hripui an do hlawhtlin dan report ngaihnawm tak tak an pek laia Mizoram CM Pu Zoramthanga'n Mizorama Covid-19 hluar chhan chu ráltlân an tam vang nia a sawi ta mai hi a pawi kan ti hle," a ti a; hripui donaa sorkar hlawhchhamzia thupna atan ráltlânte mawhphurhtir tumah Chief Minister an puh.

Myanmar ram inrêlbàwlna fel loh avangin Zo hnahthlak tam tak sipai hlauin Mizoramah an rawn tlanchhia tih sawiin MPCC chuan, "Mipuiin duat taka kan lo tuamhlàwm mek laia Covid-19 darh chhana CM berin a puh hi hriatthiam theihah kan ngai lo," an ti.

Congress party chuan, "Hnam inpumkhatna kan aupui lai leh Zo fate inzawm khawmna thu kan kalpui mek laia kan unau raltlante hri thehdarhtua dik lo taka puh an ni hi a pawi kan ti tak zet. Mizorama Covid-19 hluarna hmun tam zawk hi ráltlânte'n an chîmbuai miah lohna hmun a ni," an ti. A thusawi avangin CM Zoramthanga chu ngaihdam dil tura an phût bakah, hripui donaa MNF sorkar hlawhchhamna chu pawm a, theihtawp chhuah tawh zawk turin an ngen a ni.

MPCC chuan, "India rama total lockdown puang rei ber kan ni chunga Mizorama Covid-19 hluar zel chhan hi chu ráltlânte vang ni loin, Covid-19 donaa MNF sorkar a hlawhchham vang a ni," an ti a; mipui lamin an tih tur ṭha takin an ti a, sorkar thu an zawm ṭhat laiin, sorkarin a tih tur a ti ṭha lo hle niin an sawi.

Congress party chuan, sample endik danin duhthu a sàm loh thu te, sorkarin laboratory a din chak loh thu te, hripui veite enkawlna tur ruahmanah sorkar a chak loh thu te, Covid vaccine pek a chak tâwk loh thu te, sorkarin hripui veite a enkawl hneh lo a, khawtlang enkawl CCCC tam tak a pian phah thute an sawi a; "Covid-19 lèn lai hi sorkar laipui inhawn lai tak a ni a, medical lama kan dinhmun sawhnghehna remchang a nih laiin, MNF sorkarin hmasawnpui nana hman nachang an hre lo hi a mak kan ti tak zet," an ti.