MPYCC-in ramria duty-te hmanrua an pe

Mizoram Pradesh Youth Congress Com­mittee (MPYCC) hruaitute chuan an president Dr Lalmalsawma Nghaka hoin nimin khan Vairengte an tlawh a, ramria duty police-te hman atan bungrua leh hmanrua an pe.

MPYCC President hian ramria duty police-te tan hian puan-in (tent) leh êng chhit tur (camp light) eng emaw zat a pe a, Vairengte Police Station-a awm mek Kolasib SP Vanlalfaka Ralte hnenah a hlân a ni.

Dr Lalmalsawma chuan, ramri buai avanga engkim huama thawktute fakawm an tih thu leh police-te inpekna chhuanawm an tih thu sawiin, "Assam leh Mizoram ramri buaina avangin kan Mizo puite huan thlai a chhe nasa a, Assam police-te vangin Mizo pa ngei, mahni huana feh thei tawh lo an awm nual bawk. He buaina hi sorkar hian a rang lamin ching fel rawh se," a ti a; Mizote'n Mizoram ngeia an huan an kalpawh thei lo chu ngaihthah chi a nih loh thu a sawi.

MPYCC President chuan, North East Demo­cratic Alliance (NEDA) anga Mizoram sor­kar tiama hmarchhaka BJP thurualpuite khai­khawmtu, convener chu Himanta Biswa Sarma, Assam chief minister a nih thu sawiin, "Himanta Biswa Sarma leh Mizoram CM Pu Zoramthanga te hi dawhkân khat kîl an nihna angin, tuna buaina pawh hi an pahnih hian rang takin an chinfel vat kan phût a ni," a ti.

Mizoramah police an indaih loh avangin Assam-a awm mek Mizo 3rd IR police-te chu koh haw a ṭul thu sawiin Dr Lalmalsawma chuan, "Sorkar lai hi sorkar laipuia rorel lai BJP kaihhruai NDA nena dawhkan khat kîlho an nih angin, Assam-a Mizo 3rd IR-te hi a rang lamin ko haw rawh se," a ti a; CM Zoramthanga chu ramri buai chinfel dan tur thurûk a hriat sawi chhuak tawh tura a phût thu a sawi bawk.