COVID-19: Mizoram dinhmun : Hripui vei 581 hmuh belh a ni

July 14, Nilaini khan Mizoramah Covid-19 vei mi 581 hmuh chhuah a ni a, July thlaah mi 5,259 hmuh chhuah a ni tawh. Nimin khan hripui laka fihlim tawh mi 146 chhuahtir an ni a; hripui vangin mi pakhat a thi.

Covid-19 vei hmuh tharte chu mipa 317 leh hmeichhia 264 an ni a, ZMC laboratory-a hmuh chhuah mi 59, TrueNAT hmanga hmuh mi 25 leh RAT hmanga hmuh chhuah mi 497 an ni. Aizawla veng 43 leh khaw dang 34-a mite an ni a; Lungleiah veng pakua, Kolasib-ah veng pasarih leh Lawngtlaiah veng pangaah hmuh chhuah an awm.

Hripui vei hmuh thar mi 581-te chu natna lang chhuak 282 leh lang lo 299 an ni a; tualchhunga kái 579 leh state páwn aṭanga lut pahnih niin, tualchhunga kái zingah kàina chin hriat loh mi 192 an awm. Nimin zinga Covid-19 positive result a chhuah hnuah enkawl mek mi 5,373 an awm a, active case tam lai ber a ni.

IDSP record angin, Mizoramah Covid-19 vei mi 25,751 hmuh chhuah a ni tawh a, mipa 14,353 leh hmeichhia 11,398 an ni. Nimin tlai dar 5 thleng khan mi 20,408 (79.25%) chhuahtir an ni tawh a, mi 116 (0.45%) thi tawhin, enkawl mek mi 5,227 (20.30%) an awm.

July 14, Nilainia swab sample endik dan chu - ZMC laboratory-ah 1,465, TrueNAT hmangin district 10-ah 401 leh RAT hmangin district 11-ah 3,387 a ni a, a vaiin sample 5,253 (mipa 2,998 leh hmeichhia 2,255) niin, chuta ṭanga hripui vei hmuh chhuah 581 chu 11.06% a tling.

Nilainia district-a Covid-19 positive hmuh dan chu - Aizawl district-ah mi 272, Kolasib-ah 129, Lungleiah 58, Mamitah 57, Lawngtlaiah 49, Siahaah pariat, Champhaiah panga, Serchhipah pahnih leh Hnahthialah pakhat a ni.

ZMC-a hmuh chhuah mi 59-te chu tualchhunga kái vek niin, hri kai tawhte nena inhnaihna nei vek an ni a; symptom nei mi pasarih an awm. TrueNAT hmanga hmuh chhuah mi 25-te chu tualchhunga kái 23 leh state páwn aṭanga lut pahnih an ni a, symptom nei pali leh kàina chin hriat loh 12 an awm. RAT hmanga hmuh mi 497-te chu tualchhunga kài vek niin, an zinga 179 chu kàina chin hriat loh an ni.

Mi 581 zingah naupang kum tling lo 200 vel telin, symptom nei eng emaw zat an awm a; nausén kum khat tling lo 10 vel an tel a, thla khat pawh la tling lo pahnih an awm a ni. Kum 60 chung lam mi 40 chuang awmin, symptom nei eng emaw zat an awm a; a upa ber chu kum 91 mi a ni.

Nimin khan tlai dar 5 thlengin hripui laka fihlim tawh mi 146 chhuahtir an ni a; Aizawl district-ah mi 61, Lunglei district-ah 28, Mamit district-ah 24, Lawngtlai district-ah 15, Kolasib district-ah 11, Serchhip district-ah pali leh Champhai district-ah mi pathum an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 7,672 hmuh chhuah a ni tawh a, TrueNAT-PCR hmangin 1,646, RAT hmangin 16,432 leh Guwahati-ah pakhat hmuh chhuah a ni tawh.

IDSP tarlan danin, July 14, 2021 thlengin Mizoramah swab sample 5,41,657 endik a ni tawh a, chu'ng aṭanga Covid-19 positive hmuh tawh zat 25,751 chu 4.75% a ni. Hripui vei hmuh tawh zinga mi 21,788 chu Mizoram chhunga kái chhâwng an ni a, mi 3,963 chu Mizoram páwn aṭanga an rawn luh hnua hmuh chhuah an ni.