Minister-in department hotute a kâwm

Minister Dr R Lalthangliana chuan nimin khan Secretariat conference hall-ah a enkawl department pathum - Health & Family Welfare, Commerce & Industries leh Higher & Technical Education (HTE) hotute a kawm a; MLA panga - Lalrintluanga Sailo, Prof. F Lalnunmawia, H Biakzaua, C Ngunlianchunga leh Andrew H Thangliana te pawh an tel.

Dr R Lalthangliana chuan, hripui léng avangin hmasawnna hna sorkarin a thawk ṭha thei lo tih sawiin, "Chuti chunga department hrang hrangin mipui leh ram hmasawnna tura theihtawp in chhuah hi a lawmawm. In hmalakna ṭheuh leh in department-a thil thlengte inhriatpawh tawn a ṭul avangin meeting koh a ni," a ti.

Commerce & Indus­tries department hotute chuan, Covid-19 léng vanga sa leh thlai man to taka zawrh a nih lohna tura hma an lak dan te, veng hrang hranga puanṭhui thiam mi 300 hnenah PPE 15,000 an ṭhuitir thu te, Health department hnenah PPE 200 an pek tawh thu leh vawiinah 3,000 dang an pek leh dawn thute an sawi.

HTE department hotute sawi danin, Mizorama higher secon­dary school leh college-ah hripui léng avangin zirna pangngai neih theih a ni lo a, online class neih ṭhin a ni. Sorkarin zirlaite tan fee a tihniam a, zirna tluang pangngai bakah, rilru lama harsatna neite pui thei turin zirtirtute chu July thlaah Counselling and Mental Health training neihtir an ni.

RUSA Phase-II hnuai­ah college sak thar, chei ṭhat leh mamawh lei kawnga hmalak a nih bakah, zirtirtu post 69 hnawhkhah a ni tawh.

HFW department hotute chuan, tun dinhmunah Covid-19 avangin Mizoram hmun 43-ah containment zone leh micro-containment zone puan a ni a, Mizoramah black fungus vei an la awm lo. A thlàwnin oxygen concentrator 1,066 an dawng tawh a, chu'ng zinga 721 chu damdawi-in leh CCC hrang hrangah sem a ni.

SRH-ZMC-ah damlo 327 an awm a, Aizawla dedicated covid health centre khum 159 awmnaah khum 129 a la ruak. Sokarin Covid care centre 56 a neih mekah Covid-19 vei 1,413 an awm a, community covid care centre 199 awmah hripui vei 1,110 an awm bawk.