World Youth Skills Day Mizoramah zawm

Nimin July 15 kha World Youth Skills Day a ni a, Mizoramah pawh online kaltlanga hman niin, prime minister Narendra Modi-a'n thuchah a sawi. Thupui chu ''Hripui hnua ṭhalaite thiamna ngaihtuah' tih a ni.

World Youth Skills Day hi hripui léngin ṭhalaite theihna, chhelna leh themthiamna a do hneh loh lawmna hun atan hman a ni a; Mizorama hmannaah hian ṭhalaite'n tun maia thiamna an chhawr ṭangkai tur leh nakin huna eizawnna tling thiamna an neih theih tur sawiho a ni.

Labour, Employment, Skill Development an Entre­preneurship (LESDE) secretary Lalramsanga Sailo chuan, LESDE department hnuaiah skill development project lian tak tak kalpui mek a ni a, short term leh long term course kalpui a nih thu a sawi a, "ITI leh PMKVY hnuaiah ṭhalaite eizawnna tlak thiamna an neih theih nan leh mahni kutkea ding thei turin chher hriam an ni," a ti.

Kum 2014 khan United Nations General Assembly chuan World Youth Skills Day atan July 15 a puang a, India ramah chuan Skill India din champha kum rukna a ni nghal. He ni pual hian sorkar laipui chuan ram chhung hmun 76-ah Jan Shikshan Sansthan (JSS) a hawn belh a, JSS hmang hian a bulṭhut aṭanga skill development tihhmasawnna hna thawh a ni ang.

Ministry of Skill Development & Entrepreneursip (MSDE) chuan JSS huaiah hian course 22 hmangin India ram hmun hrang hrangah zirtirna a kalpui mek bawk.