Naupang chhawmdawl dan tur sawiho Naupang hmatheha sum hmuh phal a ni lo

Supreme Court thuchhuak ang leh sorkar laipuiin ruahmanna a siam angin, Covid-19 kaihhnawiha nu leh pa chán, naupangte chhawmdawlna leh hamṭhatna tur hrang hrang ruahman a ni a; Covid-19 emaw, chhan dang emaw vanga nu leh pate'n an thihsan naupangte hmatheha hmanga sum hmuhna atana hman phal a ni lo.

Naupangte chhawmdawl dan tur ngaihtuah hian nimin khan Aizawl DC Dr Lalhriatzuali Ralte, District Child Protection Committee chairman hoin thuneitute DC conference hall-ah an ṭhukhawm a ni.

Aizawl DCPC hotute sawi danin, Supreme Court chuan India rama state leh union territory hrang hrangte chu, India rama Covid-19 a lên nasat hnu, March 2020 hnu lama Covid vanga an nu emaw pa emaw chán leh, chhan dang vanga nu leh pa chánte chhinchhiah a, an chanchin kimchang National Commission for Protection of Child Rights-a hriattir vek turin a ti a ni.

Nu leh pate'n an thihsan tawh naupangte chu an khawsaknaah harsatna an tawh zui loh nan ei leh in tur, zirna, hriselna leh thil danga an mamawhte ngaihtuah turin Supreme Court chuan sorkar a hriattir a; vanduaina tâwk naupangte hmatheha hmanga sum hmuhna kawnga hman leh sorkarin dan a siam ang zâwm loa fa atana lak (adopt) phal a ni lo tih a tarlang bawk.

Covid-19 vanga nu emaw pa emaw chán, kum 18 hnuai lamte chhawmdawlna tur sorkar laipuiin a ruahman - PM Cares for Children - Empowerment of Covid Affected Children chu nimin khan prime minister Narendra Modi chuan a khuhhawng a ni.

Vanduaina tâwk naupangte chu chhinchhiah vek tura tih niin, kum 18 an tlin veleh PM Cares Fund aṭangin thla tin stipend an dawn theih dawn bakah, kum 23 an tlinin cheng nuai 10 an dawng thei dawn. A thlâwna zirna pek tur a nih bakah, zirna sang zawk atan student loan an la thei a, PM Cares Fund aṭangin loan interest rulhsak an ni ang.

Ayushman Bharat hnuaiah kum 18 an tlin thlengin health insurance Rs. 5,00,000 tihsak an ni dawn a, PM Cares aṭang thoin premium peksak tura ruahman a ni.

Nimina ṭhutkhawmah hian Aizawl district-a Covid-19 vanga nu/pa chánte'n PM Cares for Children - Empowerment of Covid Affected Children an hmuh theih dan tur sawiho a ni. Report-a a lan danin, Aizawl district-ah Covid-19 kaihhnawiha nu/pa chán naupang 46 an awm tawh.

Covid-19 kaihhnawiha childrens home-a hmalak dan tur an rel bawk a; report danin, childrens home bikah Covid thawh khatna chhungin home-a awm naupang pariatin hripui an vei a, a thawh hnihnaah naupang 40-in an vei tawh bawk.