Covid-19 vei mi 3 hmuh belh Mizoramah mi 16-in an vei mek

Covid-19 vei hmuh chhuah thar mi pathumte hi Delhi aṭanga rél hmanga May 31-a Bairabi rawn thleng an ni a, khung hran lai vek an ni.

An taksaah Covid-19 natna lan chhuah dan angin an la lang lo (symptom a la lang lo) a; kum 19, 22 leh 45 mite an ni a, Lunglei district, Mamit district leh Saitual district-a mi an ni.

Mamit leh Saitual district-a mite chu Covid-19 veite en­kawlna tura ruahman State Referral Hospital (ZMC)-ah nimin khan thlenpui an ni a, Lunglei district-a mi erawh chu Lungleiah enkawl a ni ang.

Mizorama Covid-19 vei hmuh chhuah hmasak ber chu Rev. VL Hruaia Khiangte, Mission Vengthlang niin, March 24, 2020-ah a vei tih finfiah a ni a; State Referral Hospital-ah zan 46 a riah hnuah dam takin May 9, 2020-ah damdawi-in aṭangin a chhuak a ni.

June 1, 2020 zanah Covid-19 hri vei hi hmuh chhuah belh leh a ni a, a záwnin ni thum chhung hripui vei hmuh chhuah belh a ni leh ta thung.

June 1-ah Delhi aṭanga rawn haw mi 10 leh Kolkata aṭanga rawn haw mi pahnihte'n Covid-19 an kai tih hmuh chhuah a ni a; June 2-ah Delhi aṭanga rawn haw pakhat hmuh chhuah leh niin, June 3, Nilaini zanah mi pathum dang hmuh chhuah leh a ni.

ZMC aṭanga thu dawn danin, Covid-19 vei mekte zingah ngaihtuahawm an awm lo a, Isolation Ward-ah enkawl an ni. ZMC-ah hian khum 300 a awm a, inhnaih lo thei anga awm a ngaih avangin Covid-19 enkawlna atan khum 150 vel awm thei tura tih a ni. ICU bikah khum 36 a awm.

Rél leh lirthei hmangin Mizoram páwna tangkhang mi ṭhahnem tak an rawn haw tawh a, Covid-19 vei hmuh tawhte chu Delhi leh Kolkata aṭanga rawn hawte vek an ni.

Tangkhang rawn hawte hi a tirah rapid antibody test (RAT)-a lang chhuak (reactive) leh Covid-19 symptom nei bak swab sample endiksak an ni ngai lo a; tunah chuan Delhi leh Maharashtra aṭanga rawn hawte chu swab sam­ple endik vek tum a ni tawh thung.