July-a hripui vei hmuh zingah Tualchhunga kai 94.44% a ni

Kumin July thla chanve (ni 1-15) chhungin Mizoramah Covid-19 vei mi 5,715 hmuh chhuah a ni a, chu'ng zinga 5,397 (94.44%) chu Mizoram chhunga kái chhâwng an ni. Mi 4,289 chu dam taka chhuahtir an ni a, mi 24 an thi thung.

Covid-19 kaihhnawih record vawng­tu Integrated Disease Surveilance Programme (IDSP)-in ni tina bulletin an tihchhuah aṭanga a lan danin, July 1-15 chhungin swab sample 57,170 endik a ni a; chu'ng aṭanga hripui vei hmuh chhuah 5,715 chu 10.00% a tling.

Ni 15 chhunga hripui vei hmuh chhuah 5,715-te chu mipa 2,823 leh hmeichhia 2,892 an ni a, 69-in hmeichhia an tam zawk. Chawhrualin ni tin hripui vei mi 381 hmuh chhuah an awm ang a ni.

Hripui vei hmuh chhuah 5,715 zingah tual­chhunga kái chhâwng mi 5,397 an nih laiin, state páwn aṭanga rawn lut chu mi 318 (5.56%) chiah an awm a; tualchhunga kái zingah kaina chin hriat loh 2,151 (39.86%) an awm. Natna lang chhuak (symptom nei) a zatve tling lo deuh, mi 2,835 (49.61%) an awm bawk.

July 1-15 chhung hian hripui laka fihlim tawh mi 4,289 chu dam taka chhuahtir an ni a, chawhrualin ni tin mi 285 chuang hret (285.93) chhuahtir ang a ni. Chhuahtir zat hi hripui vei hmuh zat aiin 1,426-in an tlem zawk.

July thla chanve chhung hian Covid-19 posi­tive thi mi 24 an awm a, thi an tam ber ní, July ni 5 leh ni 10-ah mi pathum ve ve an thi. Hripui vanga thi awm loh ní ni thum (ni 2, ni 4 & ni 6) a awm thung.