Bialtu MLA-in Chuhvel a tlawh

Hachhek bialtu MLA Lalrindika Ralte chuan July 15, Ningani khan Chuhvel khaw rama ramri vengtu Mizoram police awm mekte a tlawh a; mamawh an neihah a ṭul ang zela hmalakpui a tum thu a hrilh.

Lalrindika Ralte chuan police-te fuihna thu sawiin, "Hrehawm mah se kan tih tur, kan mawh­phurhna hlen tura pên chhuak ṭheuh kan ni. Kan ram chin humhim hi kan hnam zahawmna tur a ni a, mahni ram humhim thei lo hnam an zahawm ngai lo. Kan ṭanrualna leh inpekna avang chauhin kan ram hi kan humhim thei ang. Insawisel ringawt tum lo a, kan ṭanrual zel a pawimawh," a ti.

Ramri a buai chin tur hriat a nih loh avangin ramri vengtu police-te mamawh zualpui dap chawp ngai loa neih sa a hun tawha a hriat thu sawiin Lalrindika chuan, "Hripui a lèn avangin ramri depa awmte'n ni tam tak an eizawnna kalsana hnatlanga bûk sak a ngai zel hi pumpelh dan kawng zawn a hun tawh," a ti a; harsatna an neihte chu a hnena inthlahrung loa thlen ṭhin turin a chah.

Mizoram police-te'n buhfaiah harsatna an tawh thu sawiin MLA chuan, "DCSO lamin ip 10 chinah chuan Direc­torate-a kal a ngai an ti a, kan tan kal theih a ni si lo. Buhfai hi vawi khatah chhêk khâwl ṭeuh theih duhthusam a ni a, a khát tâwka lak reng chu hun a heh bakah, kawng a ṭhat loh avangin motor a kal thei lo a, tractor hman zel a ngai. Kudam rate talin min pe thei se chuan a lawmawm ngawt ang," a ti.

Hachhek Bialtu MLA chuan, tun hnai atana buhfai mamawh zualpui tur chu ngaih­tuahsak tiamin, ramri buai chin tur hriat a nih loh avangin buhfaia harsatna an tawh chu thuneitute hnenah a thlen tur thu a sawi.

Lalrindika Ralte chuan, Mizoram police-te chu an chawhmeh man atan Rs. 10,000 a pe a, Chuhvel VC hnenah a ṭula hman atan Rs. 5,000 a pe bawk.