Covid-19 vangin mi 120 an thi tawh

Covid-19 vangin nimin khan tlai dar 5 thlengin Mizoramah mi pathum an thi leh a; sorkar chhinchhiah angin, hripui vanga thi chu mi 120 an tling tawh a, tun July thla bikah mi 27 an thi tawh.

Hripui vei State Referral Hospital (ZMC)-a enkawl lai A Malsawmi (72) w/o R Darchhunga, Diltlang South, Lawngtlai district chu July 15, Ningani zan dar 7:40 khan a thi a, nimin khan an inah vui a ni. Thu dawn danin, A Malsawmi hi kal ṭha lo nei, damdawi-ina inenkawl tawh ṭhin a ni a; July 5, 2021 khan Covid-19 positive a ni tih hmuh chhuah niin, SRH-ZMC-ah enkawl nghal a ni.

Nimin zing dar 9:40 khan Lalnunthari (68) w/o C Chawngkunga, Serte, Lunglei district chu Covid-19 vangin SRH-ZMC-ah a thi a, nizan khan an khua thlenpui a nih hnuah vui nghal a ni. Serte aṭanga thu dawn danin, Lalnunthari hi lung ṭha lo leh thisen sang nei a ni a, hripui vei a ni tih July 5, 2021-ah hmuh chhuah niin, a tuk July 6-ah SRH-ZMC-ah dah luh a ni.

Nimin chhun dar 11:30 khan J Ramthangi (74) m/o F Rohlupuia, College Veng, Aizawl chu hripui vangin SRH-ZMC-ah a thi a, nimin tlai dar 4 khan College Veng Presbyterian Kohhran hall-ah vui a ni. Amah hi hripui vei a ni tih July 3, 2021 khan hmuh chhuah a ni a, SRH-ah enkawl nghal a nih thu sorkar thuchhuakin a tarlang.

Nimin tlai dar 6:10 khan C Chawngbuanga (74) h/o Huansiami, Venghlui chu Covid-19 vangin SRH-ZMC-ah a thi a, vawiinah vui a ni ang. Amah hi hripui vei a ni tih July 10-ah hmuh chhuah a ni a, SRH-ZMC-ah enkawl nghal a ni.