COVID-19: Mizoram dinhmun : Hripui vei 456 hmuh belh a ni

July 15, Ningani khan Mizoramah Covid-19 vei mi 456 hmuh chhuah a ni a, July thla chhungin mi 5,715 hmuh chhuah a ni tawh. Nimin khan hripui laka fihlim tawh mi 175 chhuahtir an ni a, mi pathum an thi thung.

Covid-19 vei hmuh tharte chu mipa 217 leh hmeichhia 239 niin, Aizawla veng 45, Lungleia veng pakua leh khaw dang 37-a mite an ni a; ZMC laboratory-a hmuh chhuah mi 87, TrueNAT hmanga hmuh mi 26 leh RAT hmanga hmuh mi 343 an ni.

Hripui vei hmuh thar mi 456-te chu natna lang chhuak 262 leh lang lo 194 an ni a; tualchhunga kái 447 leh state páwn aṭanga lut pakua niin, tualchhunga kái zingah kàina chin hriat loh mi 200 an awm. Nimin zinga Covid-19 positive result a chhuah hnuah enkawl mek mi 5,612 an awm a, active case tam lai ber a ni.

IDSP record angin, Mizoramah Covid-19 vei mi 26,207 hmuh chhuah a ni tawh a, mipa 14,570 leh hmeichhia 11,637 an ni. Nimin tlai dar 5 thleng khan mi 20,653 (78.81%) chhuahtir an ni tawh a, mi 120 (0.45%) thi tawhin, enkawl mek mi 5,434 (20.74%) an awm.

July 15, Ningania swab sample endik dan chu - ZMC laboratory-ah 1,045, TrueNAT hmangin district 11-ah 299 leh RAT hmangin district 11-ah 3,193 a ni a, a vaiin sample 4,537 niin, chuta ṭanga hripui vei hmuh chhuah 456 chu 10.05% a tling.

Ningania district-a Covid-19 positive hmuh dan chu - Aizawl district-ah mi 271, Kolasib-ah 62, Lungleiah 58, Mamitah 26, Siahaah 12, Serchhip leh Lawngtlaiah 10 ve ve, Champhaiah paruk leh Saitualah pakhat a ni.

Mi 456 zingah naupang kum tling lo 130 chuang telin, an zinga 70 chuangin symptom an nei a; nausén kum khat tling lo paruk awmin, a naupang ber chu kar hnih mi a ni. Kum 60 chung lam mi 30 chuang awmin, a tam zawkin symptom an nei a, a upa ber chu kum 85 a ni.

Nimin khan tlai dar 5 thlengin hripui laka fihlim tawh mi 175 chhuahtir an ni a; Aizawl district-ah mi 126, Kolasib district-ah 26, Mamit district-ah pakua, Champhai district-ah pasarih, Serchhip district-ah pathum, Hnahthial district-ah pahnih leh Lunglei leh Saitual district-ah mi pakhat ve ve an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 7,759 hmuh chhuah a ni tawh a, TrueNAT-PCR hmangin 1,672, RAT hmangin 16,775 leh Guwahati-ah pakhat hmuh chhuah a ni tawh.

IDSP tarlan danin, July 15, 2021 thlengin Mizoramah swab sample 5,46,194 endik a ni tawh a, chu'ng aṭanga Covid-19 positive hmuh tawh zat 26,207 chu 4.80% a ni. Hripui vei hmuh tawh zinga mi 22,235 chu Mizoram chhunga kái chhâwng an ni a, mi 3,972 chu Mizoram páwn aṭanga an rawn luh hnua hmuh chhuah an ni.