MJA-in an chunga thil thleng nâ an ti
Mizoram Journalists’ Association (MJA) chuan nimin khan Aizawl Press Club-ah General Body Meeting an nei a; tun hnaia thil thleng chungchangah thuchhuah (press release) siamin, Mizoram sorkar chu inhawng tur leh media hmang ṭangkai lehzual tura an duh thu an tarlang a, tun hnaia journalist-te chunga thil thleng chu na an tih thu an tarlang.
MJA thuchhuah chuan, MJA leh Mizorama journalist-te'n tun hma aṭangin kawng hrang hrangin Mizoram sorkar leh a hmalakna ṭha taka ṭawiawmin a thláwp ṭhin tih sawiin, tun hnaiah sorkar nena thawh dunna ṭha tiṭhuanawp thei thil journalist-te chunga thleng a awm leh zauh ṭhin tih an tarlang a ni.
Mizoram sorkarin July 14, 2021-a ramri chungchang tlawmngai pawl, political party leh MKHC aiawhte a sawipuinaah, journalist-te chu hun rei lo te chhung thlalak takngial pawh phalsak an ni lo tih sawiin MJA chuan, "Phalsak an nih loh chhan leh phalsak lotu sawi chian fak tur awm loa hnar an ni hi MJA chuan hriatthiam har a ti a, tun hma aṭanga rilru thianghlim taka sorkar a thawhpui tawh ṭhinnate ngaihtuah phei chuan na a ti hle a ni," an ti.
Ramri chungchang sawihonaah hian journalist-te chu luh leh thlalak phalsak an nih loh hnuah sorkar mite'n lut turin an sâwm leh a, journalist-te an lut duh tawh lo anga sawi a awm. Hemi chungchangah hian MJA chuan, inkhawm ṭan a nih aṭanga darkar chanve chuang páwn lama awm journalist-te'n lut tura sâwmtu an awm an hriat loh thu an sawi thung tih an tarlang.
MJA chuan, sorkarin inhmuh khawm a kohin journalist-te'n chanchin hriat tumin a theih ang angin an ngaihven ṭhin tih sawiin, "Sàwm an nih lohnaah pawh chanchin thar hre tura kal hi journalist hna dik tak a ni. Amaherawhchu, tel phalsak an nih lohnaah chuan tel an tum lui tlat ngai bik lo," an ti.
Ramria buaina chungchangah ṭhenawm state-te'n an media-te an hmang ṭangkai thiam a, an thawhpui thiam ṭhin tih sawiin MJA chuan, "Mizoram sorkar hotute pawh Mizoram media-te hmang ṭangkai ve turin thurawn pek an ni tawh," an ti a; mahse, tun thlengin media hman ṭangkai tumna tak tak a la awm lo nia an hriat thu an sawi.
MJA tarlan danin, Mizoram journalist zingah phai lam (national/regional) media-a ziak ṭhin an awm nual a; chu'ng mite chuan Mizoramin a hlâwkpui tur zawng leh Mizoram ṭan zawng emawa thu ziak turin Mizoram sorkar hotute biak ṭawng theih an nei ngai lo a ni.
Ram leh hnam hmasawnna atan te, ram leh hnam tana ṭha tur ang chi-ah ṭhahnemngai takin sorkar an thawhpui zel dawn tih sawiin MJA chuan, "Sorkar pawh journalist-te tana inhawng a, journalist-te inhuamna pawh ngaihthlaksak ṭhin turin kan beisei a ni," an ti.