Mizo ṭhui PPE 3,000 HFW hnenah hlân

'Scheme for Support of Local Artisans who lost their sources of livelihood due to COVID-19 pandemic/lockdown' hnuaia Commerce & Industries department-in Aizawla puanṭhui thiamte a ṭhuitir personal protective equipment (PPE) 3,000 chu nimin khan Health department hnenah an hlân.

PPE hlanna inkhawm hi Secretariat tualah neih a ni a, department pahnihte enkawltu minister Dr R Lalthangliana'n a hmanpui.

Dr R Lalthangliana chuan, Commerce & Industries department-in Mizo siam ngei PPE Health department hnena a hlan chu lawmawm a tih thu a sawi a, "ICU-ah pawh hâk theih tur khawpa ṭha, ZMC doctor-te duh dan anga ṭhui a ni a, mi eng emaw zat tan eizawnna siamsakna a ni tel hi thil chhinchhiahtlak a ni," a ti.

Mizoram leh Mizote siam ngei mipuiin hman uar a ṭul thu sawiin Minister chuan, "Hripui lèn laia Mizo siam hmai tuamna, PPE leh hmaikáwrte hman kan uar ang bawkin, hripui kian hnuah pawh mahni state siam leh thar chhuah hman uar kan zir a ṭul," a ti a; ram danga thawn chhuah tlak khawpa kuthnu mám leh ṭha ṭhui/siam zel a pawimawh thu a sawi.

He scheme kalpuina tur hian a bul ṭan nan Disaster Management & Rahabilitation (DMR) department aṭangin July 7, 2021 khan cheng nuai 140.36 hmuh a ni a, a thawh khatnaah PPE 21,600 thui tura ruahman a ni.

Aizawl veng hrang hranga LLTF-te kaltlanga puanṭhui thiam thlan chhuah mi 300 hnenah PPE ṭhui tur zai sa leh hmanraw dangte LLTF kaltlangin pek a ni a; PPE pakhat Rs. 150 zela ṭhuitir niin, mi pakhatin 50 zel an ṭhui. July 14, Nilaini thleng khan PPE ṭhui zawh tawh 5,360 lâk khawm a ni tawh.

PPE hi July 1, 2021 khan Health department hnenah 2,000 hlan a ni tawh a, nimina hlan nen a vaiin 5,000 an pe a ni.