KHAWTHLIR

Thisen pe
Maubuang Branch YMA chuan nimin khan Zoram Medical College tan thisen unit 49 an pe a, petute mipa 40 leh hmeichhia pakua an ni. Kolasib Khuangpuilam Branch YMA-a Khuangchera Section pawhin District Hospital blood bank-ah nimin khan thisen unit 13 an pe a, petute mipa pasarih leh hmeichhia paruk an ni. Khuangpuilam YMA hian July 14-16 chhungin ni tin thisen an pe a, a vaiin mipa 25 leh hmeichhia pasarihte'n unit 32 an pe a ni.

Sangha note sem
Mizoram Cooperative Fish Farming Marketing & Processing Federation Ltd. (ZOFISFED) chuan lockdown avanga sangha khawitute harsatna phuhrûkna atan nimin khan sangha notê an sem. Sem chhuahna inkhawm tawi hi an chairman F Lalnienga hoa hman a ni a, Mizoram hmun hrang hrangah an sem chhuak a ni.

SRH-ZMC pe
Mizoram Medical Laboratory Technology Graduate Association (MMGA) chuan nimin khan SRH-ZMC-a thawktute hnenah ei tur leh Poor Fund atan Rs. 11,000 an pe a, laboratory staff-te ei leh in senso atan Rs. 4,500 an pe bawk. MMGA chuan Covid-19 avanga hlawh beisei loa thawk tura inpe zawng zawng chungah an lawm thu an tarlang.

Lirthei tlân dan tur
Aizawl Traffic SP Rodingliana Chawngthu chuan nimin khan Covid-19 inkaihhruaina pawhsei chhunga Aizawl khawpuia city bus, taxi leh two wheeler taxi intlân chhâwk / indin chhâwk dan tur a tichhuak a; curfew hun chhung, zan dar 7 aṭanga a tuk zing dar 4 inkarah tlân phal a ni lo. Taxi leh two wheeler taxi-te chu sticker an neih mila tlantir an ni a, city bus-te chu Aizawl City Bus Owners Association-in routine an siam angin bus 80 aia tam lo an tlân ṭhin a ni.

Containment zone
Bethlehem Vengthlang, Ramhlun Venglai, ITI Veng leh Venghluia hmun ṭhenkhat chu nimin khan containment zone-ah puan a ni. Saron Veng, Dawrpui Veng, College Veng, Armed Veng South leh Sairang Dinthara hmun ṭhenkhat, containment zone-a puan tawhte chu hlih a ni tawh a, containment zone-a puan chhunzawm hmun ṭhenkhat a la awm bawk.