Hripui do chungchang sawiho a ni

Information & Public Relations (IPR) minister Lalruatkima kaihhruaiin nimin khan Secretariat conference hall-ah IPR department leh electronic media - Doordarshan, All India Radio, LPS Vision leh ZONET Cable TV aiawhte'n Covid-19 donaa electronic media kaltlanga mipui zirtirna kalpui dan tur an sawiho.

Lalruatkima chuan, Covid-19 donaah nasa lehzuala ṭan lak a ngaih thu sawiin, "Mipui zirtir leh Covid-19 chungchanga puanzar tur pawimawh thilah sorkar leh media (print leh electronic)-te'n thawhhona ṭha tak in nei hi a lawmawm," a ti a; hripui léng chungchanga mipui zirtirna chu inhrilh zawh tih a awm theih loh avangin ṭan lak reng a ngaih thu a sawi.

Ṭhutkhawmah hian, mipui zirtirnaa hmalakna hrang hrang - slogan, video clips leh programme awm theite sawiho a ni a; IPR Director hoa hmalak ni se, remchang hmasa berah ṭhutkhawm leh ni se, an ti.

Electronic media aiawhte chuan, Covid-19 donaa sorkar hmalakna puanzar leh thehdarh an inpeih reng thu an sawi niin sorkar thuchhuahin a tarlang.