Mi dang mawhpuh bànsan turin CM chah

ZPM Ṭhalai chuan thuchhuah siamin, Prime Minister-in hmarchhak state chief minister-te a kawmnaah CM Zoramthanga'n Mizorama hripui hluar chhanah Myanmar aṭanga ráltlânte a puh chu an dem thu an tarlang a; mi dang kuhmûma pàr tumna leh mi dang mawhpuh bànsan turin CM an chah.

ZPM ṭhalaite chuan, "Mizorama hri léngin zual lam a pan chhanah khawchhak lam aṭanga kan unau ráltlânte a puh mai bakah, he thila inrawlh tura Central sorkar a pun hial hi ZPM ṭhalai chuan dawihzep thil tihah kan ngai. Mizorama hri léngin ziaawm lam a pan theih loh chhanah hian sorkar hotu ber Pu Zoramthanga hian mawh a la ngam lo a nih pawhin, kan unau ráltlânte kher chu puh lo turin kan ngen a ni," an ti.

Hripui thawh hnihna a thlen hmain Mizoram sorkarin inbuatsaihna hun ṭha a nei chungin a muthlu tih sawiin ZPM Ṭhalai chuan, "A thawh hnihnaah harsatna nasa tak kan tâwk ta a ni. Kan unaute rilru tina thei zawnga sorkar hruaitu berin ṭawng a cheh hi a zahthlâk hle," an ti a; MNF sorkar chu ṭhat lai chauh ni lo, chhiat lai ber pawha mipui aiawh tura thlan an nih thu an sawi.

ZPM ṭhalaite chuan, ráltlante'n an pan ber Champhai district-ah press release an siam laiin hripui vei enkawl mek mi 38 an awm thu sawiin, "Hri léngin zual lam a pan zel chhan hi khuarel chhiatna vang ni bawk mah se, sorkar aṭanga ruahmanna felfai a awm loh vang a ni ber," an ti a; CM Zoramthanga kaihhruai sorkar chu mipui kuhmûma pàr a, thangṭhat lâk an hreh lo ang bawkin, an chetsualnaah pawh mi dang puh loa thu dik sawi a, a dik lo lai siamṭha ngam turin an chah a ni.