PE dept.-in electric bill an sawifiah

Power & Electricity department chief engineer (RE) Lalhmingliani Hmar chuan electric bill siam dan a sawifiah a; May 10, 2021 aṭanga sorkarin total lockdown a puan avangin consumer energy meter reading lâk, bill sem leh bill counter hawn tihtawp lailâwk a nih thu a tarlang.

PE Chief Engineer chuan, electric bill chungchangah tualchhung chanchinbu, TV chanchin thar leh social media hrang hrangah thu dik lo vawrh darh a awm niin a tarlang a ni.

PE Department sawifiahna
1. May 10, 2021 aṭangin total lockdown a nih avangin energy meter reading lak, bill sem leh bill counter hawn tihtawp lailâwk a ni a, JERC (M&M) Supply Code Regulations, 2013 Clause-5.22 tlawhchhana meter reading lak theih a nih lai thla hnuhnung pathuma energy hman zat aṭanga thla khat average chhût chhuah hmangin provisional bill siam a ni.

2. Bill sem chhuah a nih dawn loh thute, online hmanga bill pe duh leh pe thei tan pek theih a nih tur thu te, online hmanga bill pe thei lo tan pawh bill counter hawn theih a nih ve leh bill pek tlai avanga a pung tel loin a hlâwma pek mai tur a nih tur thute, meter reading a pangngaia lak theih a nih veleh provisional bill siam tawhah siam rem ngai a awm chuan siam rem a nih tur thute June 1, 2021-ah tihchhuah a ni.

3. JERC-in êng chhit man thar a bithliah chu April 2021 thlaa chhit man aṭanga hman ṭan tur a ni a, PE department-in bill a siam ṭhin danah April thlaa power hman man hi June thlaah bill ṭhin a ni. Provisional bill pawh eng chhit man thar hmanga siam a ni.

4. Provisional bill siamah tihsual palh a awm thei a, complaint thehlut duh leh bill pe duh tan Sub-Division office bikah bill counter July 5, 2021 aṭangin hawn ṭan leh a ni a, mamawhtute tan mahni bialtu SDO office pan theih a ni.