CM thu sawi media ṭhenkhatte'n An puanzar dan a dik tâwk lo - CMO

Prime minister Naren­dra Modi hoa July 13, 2021-a hmarchhak state chief minister-te'n virtual meeting an neih chungchangah Chief Minister’s Office (CMO) chuan nimin khan thuchhuah a siam a; media ṭhenkhatin chief minister Zoramthanga thusawi an puanzar dan chu a dik tâwk lo niin a tarlang.

CMO chuan media ṭhenkhatin CM Zoramthanga thusawi ṭhenkhat chu an kàilek nia tarlangin, "Kan thu lâkna (source)-in a tarlan danin, 'Mizoram CM chuan a state chhunga Covid-19 punna chhanah Myanmar leh Bangladesh aṭanga refugee lo lutte a puh thu leh ṭanpui an ngaih thu Prime Minister a hrilh,' tiin an tarlang. Hei hi thu belhchian dâwl lo leh a ngaithlatu leh chhiartute tana ngaihtuahna hruai sual thei thil a nih avangin CMO chuan a ngai thu tak hle a ni," a ti.

PM hoa meeting-ah hian Zoramthanga chuan, hripui chungchanga Mizoram dinhmun a sawifiahnaah, Mizoram chu Myanmar leh Bangladesh rîa awm a nih thu leh dan loa luh rûk theihna hmun tam tak a awm thu a sawi tih CMO chuan a tarlang.

CMO chuan, "Kum kal ta, hripui thawh khatnaah hian CM chuan hripui dona kawngah Mizoram a chêt ṭhat thu leh hri kai pawh an tlem hle thu a sawi a. Hei hi mi tlawmngaite inpekna avang a ni tiin chhuanawm a tih thu a sawi. Heta kum kal taa Covid-19 dona chungchang a sawiah hian Myanmar leh Bangladesh ráltlânte avanga hri kai kan pung tih khawiah mah sawina a awm lo," a ti.

CM Office chuan, CM-in Myanmar-ah February 2021-a sipai sorkarin mipui sorkar a paihthlak avanga Myanmar rama Mizo tam tak Mizoramah himna zawnga an luh thu a sawi tih a tarlang a, "Pu Zoramthanga chuan Myanmar aṭanga Mizo unau lo lutte hi kan thisen zawmpui, kan u leh naute an nih avangin Mizoram tan hnar leh nawr kîr chi an ni lo, a ti. Hripui thawh hnihnain nasa taka Mizoram a nuai avangin sorkar chuan a sum neih ang angin hripui a do a ngai a, kan unau raltlante tuamhlawm an ngai bawk..." a ti a; CM chuan PM hnenah Mizoramin ṭanpui a ngaih thu a sawi tih a tarlang.

Thu belhchian dâwl lo thehdarhin mi tam tak thinlung a hliam thei tih tarlangin CMO chuan, "Chi leh chi, hnam leh hnam inkarah khì a siam thei tih hriain thuthar thehdarhtute pawhin an thu lakna a dik tâwk em tih finfiah a, fimkhur lehzuala thu kan puan zar ṭhin a ṭul a ni," a ti.