Niminah mi 340 swab endik

Nimin khan Zoram Medical College (ZMC) Covid-19 Laboratory-ah mi 340-te swab sample endik a ni a, nizan lamah result hriat theih beisei ni mah se, he thu ziah lai hian kan hre hman lo. Nimin vek khan State Referral Hospital (SRH)-ah Covid-19 hripui vei pahnih leh rinhlelh thilah mi 21 dah luh an ni.

June 3, Nilaini khan ZMC Laboratory-ah mi 250 endik an ni a, chu'ng zinga pathum chuan Covid-19 an vei tih hmuh chhuah niin, mi 247-te erawh chuan hripui an kai lo tih hmuh a ni. 

Covid-19 vei rinhlelh thila nimina mi 21-te SRH-a dah luh zinga mi pakuate leh Nilainia dah luh zinga mi pahnihte swab sample chu endik mek a ni a; nimina admit zinga mi 12-te sample chu vawiinah endik a ni ang. Hetih lai hian, R Dengṭhuama Hall quarantine centre-a awm khung hran mekte zinga hmeichhe pakhat chu nau nei turin SRH-ah dah luh a ni a, nimin khan nau neiin, NICU-ah enkawl mek a nih thu SRH-ZMC bulletin chuan a tarlang.SRH-ah hian nimin tlai dar 5 thlenga dinhmun ang chuan, mi 45 an awm mek a, mi 15 chu Covid-19 vei finfiah tawh niin, Isolation Ward-ah dah an ni. Risk Ward-ah mi 24, NICU-ah mi pakhat leh Holding Ward-ah mi panga an awm bawk.

June 3 tlai dar 5 leh nimin tlai dar 5 inkarah Mizoram luhka hrang hranga screening point-ah mi 962 enfiah an ni a, rapid antibody test (RAT) hmangin mi 928 endik an ni bawk.