ASF vanga vawk thi chungchangah Zangnadawmna diltu 3,500 tling tawh
African Swine Fever (ASF) avanga vawk chánte tan ṭanpuina pek theih dan tur chi thum sorkarin a buaipui mek a, chhungkaw 3,500 velin zangnadawmna dilna an thehlut tawh.
Vanglaini palai zawhna chhángin ASF nodal officer Dr Lalhmingthanga, AH&Vety joint director (Livestock Health) chuan, ASF vanga vawk suat leh vawk thi neitute'n zangnadawmna an dawn theih nan kawng thumin hma an lak thu a sawi a ni.
Dr Lalhmingthanga chuan, "Hemi atana pawimawh ber chu, ASF vanga vawk thi, suatte leh a neitute data neih ṭhat a ni a, chumi tur chuan theihtawp kan chhuah a ni," a ti a; hri lên dan enin, ASF chuan a thlen san lai ber (peak) a thleng tawha an hriat thu leh, July thla hnu lamah chuan a ziaawm an beisei thu a sawi.
Zangnadawmna chu chi thumin an buaipui dawn tih sawiin Dr Lalhmingthanga chuan, "Vawk vulhtute'n an tawrh nasat avangin Mizoram sorkar chuan ASF vanga vawk thite ràlna pek ṭha a ti a, ràlna pek zat tur leh pek hun tur erawh sorkarin a la ngaihtuah ang," a ti.
AH&Vety Joint Director chuan, ASF léng chu disaster-a puang turin Disaster Management & Rahabilitation department hnenah lehkha an thehluh thu a sawi a, "ASF vanga vawk vulhtute harsatna tawh chu sorkarin disaster-a a puan chuan DMR hnuaia State Disaster Response Fund-ah ṭanpuina pek theih an ni ang," a ti a; chutiang tur chuan lehkha an kaltir mek thu a sawi.
Veterinary officer hriatpuina certificate neia ASF vei vawk suatte tan sorkar laipuiah scheme awm sa hmangin zangnadawmna dilsak an nih dawn thu sawiin Dr Lalhmingthanga chuan, "Zangnadawmna kan dilsak theih nan data kan neihte hi sorkar laipuiah kan pe zel. Ni tin data a la luh reng avangin July thla chhung hi kan la innghak khawm rih ang a, chumi hnuah kan boruak tawn azirin sorkar laipuiah dilna kan thehlut ang," a ti.
Aizawl district-ah chuan ASF vanga vawk thi leh damlote neitute'n an hming, Aadhaar number, phone number leh vawk thi zatte phone number - 8731975444/ 8947027269 leh 8974964643-ah whatsapp hmangin thawn theih a ni a; dcmiz@gmail.com leh directorvetymiz@gmail.com ah thawn theih a ni bawk.