Myanmar ráltlân ngaihsak turin MP Vena'n sorkar laipui a ngen

Rajya Sabha MP K Vanlalvena chuan, Myanmar buaina avanga Mizorama rawn ráltlânte ngaihsak turin sorkar laipui hotute nimin khan a ngen.

Nimin khan Parliament Annexe meeting hall-ah Parliament session neih tur thlirlâwkna neih a ni a; sàwm a nih angin K Vanlalvena chuan thu sawiin, "Myanmar aṭanga ráltlân mi eng emaw zat Mizoramah an awm a, tlawmngai pawl leh sorkarin a theih ang angin a ṭanpui ṭhin. Mizoram sorkarin ráltlânte tan hian camp pakhat a siam a, an leng lo nasa hle a ni," a ti.

K Vanlalvena chuan, Mizoramah ráltlân lut leh chhuak an awm reng thu sawiin, "Mizoram sorkar leh tlawmngai pawlte'n theihtawp chhuahin buaipui mah ila, sum leh pai leh thil dangah harsatna chin a awm thei. Ráltlânte hi Mizoram ngaihtuah tur chauh ni loin, ram pum ngaihtuah tur thil a ni," a ti a, sorkar laipui hotute chu Myanmar ráltlânte ngaihsak turin a ngen.

Rajya Sabha MP chuan, Myanmar-ah Covid-19 a lên nasat thu sawiin, "Covid-19 avangin Myanmar-ah mi tam tak an thi a, oxygen an indaih lo nasa hle. Mizoram aṭangin oxygen an rawn lei ṭhin a ni," a ti.

Meeting-ah hian Lok Sabha leh Rajya Sabha-a party leader tinte sàwm an ni a, Parliamentary Affairs minister Pralhad Joshi-in kaihruaiin, prime minister Narendra Modi, Defence minister Rajnath Singh leh hruaitu pawimawh dangte'n an ho a ni.