KHAWTHLIR

Thisen pe
Inrinni khan Durtlang Branch KṬP chuan Synod Hospital blood bank tan thisen unit 40 an pe a, petute mipa 32 leh hmeichhia pariat an ni. Serchhip Bial PYD pawhin District Hospital blood bank tan Inrinni vek khan thisen unit 45 an pe a, petute hmeichhia 23 leh mipa 22 an ni.

Staff nurse exam
Mizoram Subordinate Services Selection Board (MSSSB) chuan, July 29-30, 2021 chhunga staff nurse lakna atana exam buatsaih tura tih chu Covid-19 boruak ngaihchàn a ṭul avangin August 6-7, 2021 ah sawn a nih thu an tarlang.

Zan curfew puang
Aizawl Bawrhsap chuan Aizawl khawpuiah July 18, aṭangin zan lam curfew a puang a, curfew-in a huam lohte a tarlang nghal. Curfew hi zan dar 7 leh zing dar 4 inkarah puan a ni a, thupek hi thu dang a awm hma chuan thla hnih chhung hman tura tih a ni. (Curfew-in a huam lohte phek 2-ah)

SMATEE hun sawn
Higher & Technical Education (Technical Wing) chuan July 27, 2021-a SMATEE 2021 neih tura ruahman chu sawn hlat a nih thu an tarlang. SMATEE neih hun tur chu a thara tihchhuah leh tur a ni a, application form thehluh hun tàwp pawh July 30, 2021 chhun dar 12 thleng pawhsei a ni.

In sak hawng
Minister of state Lalruatkima chuan July 17, Inrinni zing khan a bial Aizawl West-II chhunga Tuikual South-a Jubilee Hall leh anganwadi building a hawng. In pahnihte hi MLA fund hmanga sak a ni a, Jubilee Hall chei ṭhatna atan cheng nuai 5.5 leh anganwadi sakna atan cheng nuai 3.5 hman a ni. Minister hian Tuikual South-a UDPA sum nuai 26 hmanga lei dawh a en nghal bawk.

Enkawl lai 5,805
July 17, Inrinnia Mizorama swab sample endik aṭanga Covid-19 positive result nimin zinga tihchhuah a nih hnuah hripui vei enkawl mek mi 5,895 an awm a, enkawl mek an tam lai ber a ni. Nimin chhun lama mi 90 chhuahtir an nih hnuah active case 5,805 an ni.

Lawngtlaiah sum hman dan tur sawiho a ni
Lawngtlai District Level Committee chu an chairman Dr Andrew H Vanlaldika, bawrhsap hoin July 16, Zirtawpni khan a pisaah an ṭhukhawm. Hna thawh tur ruahmante detailed project report (DPR) chu July 23, 2021 hmain North Eastern Council-a thehluh tur a nih thu leh DRDA Project Director hoin DPR siam mek a nih thu an tarlang. Ṭhutkhawmah hian, sorkar laipuiin India hmarchhak hmun kilkhawr leh hnam tlem zawkte tana NEC budget 30% (Rs. 5,00,00,000) a dah hran aṭanga kum 2021-22 chhunga Lawngtlai district-a Lai hnam hmasawnna atana sum hmuh turte hman dan tur an sawiho a ni.