Hripui vangin 2 thih belh

July 17, Inrinni leh nimin Pathianni khan Mizoramah Covid-19 vei mi pakhat ve ve an thi a; sorkar chhinchhiah angin, nimin tlai dar 5 thlenga hripui vanga thi chu mi 122 an tling tawh.

Covid-19 vei State Referral Hospital (ZMC)-a enkawl lai K Lianthangi (75) m/o Zoliansangi, Ramhlun North chu July 17 zan dar 9 khan a thi a, nimin chawhma dar 10 khan RSC Field-ah vui a ni. Thu dawn danin, K Lianthangi hi Covid-19 vei a ni tih July 16, Zirtawpni khan hmuh chhuah niin, SRH-ah dah luh nghal a ni a; zunthlum nei sa a ni.

Lalchhungi (65) w/o Laldawngliana, Sairang Dinthar chu nimin chawhnu dar 3:40 khan Covid-19 vangin SRH-ah a thi a, nizan khan vui nghal a ni. Sorkar thuchhuak tarlan danin, Lalchhungi hi Covid-19 positive a ni tih June 26, 2021-ah hmuh chhuah a ni a, June 28-ah SRH-ah enkawl ṭan a ni. Zunthlum leh thisen sang nei sa a nih thu Sairang Dinthar VTF hruaitute chuan an sawi.