Ni 18 inthlahdul deuh a nih hnuah Aizawlah total lockdown puan a ni

Mizoram sorkar chuan July 1, 2021 aṭangin ném deuh zawka inkhuahkhirhna a kalpui hnuah, July 17, Inrinni zanlai aṭangin Aizawl Municipal Corporation (AMC) huam chhungah total lockdown a puang a, July 24, 2021 zanlai thleng a awh ang. Covid-19 kaihhnawiha tih tur nei lo sorkar office zawng zawng khàr a ni dawn.

Covid-19 léng thawh hnihna a darh hnuah Mizoram sorkar chuan April 20, 2021-ah inkhuahkhirhna a kalpui ṭan a, chumi hnuah lockdown kalpui lehin, May 10 aṭangin total lockdown puan a ni. Total lockdown hi ṭum eng emaw zat pawhsei a ni a, June 30 thleng a awh. July 1-a hman ṭan tur inkaihhruaina thar chu June 29-ah tihchhuah a ni a, inkhuahkhirhna thlahdul hret a ni.

June 29-a Standard Operating Procedure (SOP) tihchhuah chu July 15 thlenga hman tura tih ni mah se, July 17 thleng pawhsei a ni a; chumi hnuah July 16, Zirtawpni zan khan SOP thar tihchhuah niin, July 17 zanlai aṭangin Aizawlah total lockdown puan leh a ni.

State Executive Committee (SEC) chairman Lalnunmawia Chuaungo, chief secretary tarlan danin, Covid-19 darh zel tur vènna atan hun rei tak chhung sorkarin inkhuahkhirhna a kalpui tawh a, ni tin nunphung leh eizawnnate nasa takin a nghawng a ni. Mahse, Covid-19 vei thar an pung zel a, hripui vei ni tina hmuh chhuah zat chawhrual chu April-ah 55, May-ah 202, June-ah 270 leh July kal mekah 381 a ni a, thla tin a pung.

AMC huam chhung bikah chuan July 2021 thla chawhma lama ni tina hripui vei hmuh chhuah thar chawhrual chu 211 a ni. Hripui vei an pun chak êm avangin inenkawlna atana hmunhma leh hmanrua (healthcare facility)-te'n a zo lo thei mai dawnin a lang.

SEC Chairman chuan, Covid-19 vei thar pung zel tur chhut chahna tura sorkar hmalakna tihsamkhaina atan AMC area-ah total lockdown puan ṭula hriat a nih thu a tarlang a, "AMC huam chhung leh páwn atan inkaihhruaina tihchhuah a ni," a ti.

Aizawl khawpui huam chhunga SOP siam thar chu total lockdown kalpui tawhte aiin a khauh zawk a, ṭum danga tih ngai loh - task force-te chu an venga kàwn leh chhuah rûk theihna leh hmun pawimawhah hrui pawta duty dah tura ngen leh hriattir an ni.

Mizoram district dangah chuan DC-te'n an district-a Covid-19 dinhmun azirin inkaihhruaina hran an siam thung.

AMC area-a SOP thar ṭhenkhat
. DMR, HFW, Police, Fire & Emergency Services, Home Guard, Prisons, Forensic, Excise & Narcotics, Finance, Treasury, district administration, Civil Aviation, IPR, FCSCA, EFCC, PPI leh NIC/ICT-te chu pisa kal phal a ni a; department dang zawng pisate chu khàr tur niin, ṭul bika pisa kai ngai an awm chuan SEC Secretary-ah phalna dil a ngai. Pisa kai lote leh Covid-19 duty-a tel lote chuan in lam aṭangin hna an thawk ang.
. Gauhati High Court (Mizoram Bench) leh a hnuaia court-te chu High Court-in ruahmanna a siam angin an kal ang.
. Kohhran pisa, bank, ATM, post office leh postal service-te chu hna ṭul bik thawk tura kal phal a ni.
. NGO office-te chu Covid-19 dona atan bika hna ṭul zual thawk turin a tlem thei ang ber an kal thei.
. Zirna-in, private company/office, public park, picnic spot, sport tournament & practice, zing/tlai insawizawi, cycling exercise, gym/spa, champha lawm, chaw eikhawm, NGO leh kohhran thila ṭhutkhawm, lui kal, trekking, hiking, adventure sport, courier service, e-commerce, home delivery leh commercial vehicle service phal a ni lo.
. Board/recruitment exam, a hun sawn theih a nih loh avanga sorkar phalna la tan chauh phal a ni.
. Biak-ina inkhawm/ṭawngṭai inkhawm phal loh a nih rualin, sorkar phalna laa programme siam phal a ni.
. Construction works - sorkar leh mimal hna kallaite chu a hmuna awmchilhtute chhawrin thawh phal a ni a, hnathawhna bungrua pawh hnathawhna hmuna awm sa chauh hman tur a ni.
. Carpentry, steel fabrication, bakery, puanṭhui leh puantahnate a hmuna awmchilhtute tan phal a ni.
. Huan, lo, sangha dil leh ran vulhte chu ṭul bik thilah thawh phal a ni a, LSC/pass emaw LTF hriatpuina lehkha ken a ngai.
. Damdawi-in, nursing home, clinic, tarmit dawr, laboratory, blood donation leh blood bank-te hawn phal a ni.
. Covid-19 vaccination leh immunization programme dangte leh ambulance service-te phal a ni a; vaccine la turte'n LTF hriatpuina neih a ngai.
. Animal disease control programme, veterinary hospital, dispensary, clinic, zoo, hatchery, feed mill/ran chaw leh slaughter house-te hawn phal a ni.
. Gas sem, ration dawr leh buhfai kudam, petrol/diesel filling station hawn phal a ni a; petrol/diesel la turte'n an awmna LTF phalna an lak hmasak a ngai.
. Child & women helpline service, OST center, OSC, ART centre-te DC phalnain hawn theih a ni.
. Nau pâi, nausên pawm leh naupang hnena nutrition sem, phurh chhuah leh semte DC phalnain tih theih a ni.
. Septic tank service chu emergency thilah LTF hriatpuinain phal a ni.
. Eichawp dawr hawn phal a ni lo. Mamawh zual tan LTF-te'n ruahmanna an siam ang.
. Sorkara vegetable supply chain khawihtute leh LTF-te inráwnin sa, thlai leh thei zawrhna an ruahman ang.
. Damdawi dawr tiam loin dawr dang zawng hawn phal a ni lo.
. Loh theih loha inneih huaihawt ngai tan lehkhaa ziakin dcaizawlpermit@gmail.com emaw whatsapp number 8787451776-ah dilna thehluh tur.
. LTF-te chu an venga kâwn leh chhuah rûk theihna leh hmun pawimawhah hrui pawta duty dah tura ngen an ni.