COVID-19: Mizoram dinhmun : Hripui vei 946 hmuh belh a ni

July 16-17, 2021 khan Mizoramah Covid-19 vei mi 946 hmuh chhuah a ni a, July thla chhungin mi 6,661 hmuh chhuah a ni tawh. Inrinni leh nimin khan mi 397 chhuahtir an ni a, mi pahnih an thi.

July 16, Zirtawpniah Covid-19 vei mi 483 hmuh chhuah niin, mipa 231 leh hmeichhia 252 an ni a, ZMC laboratory-a hmuh mi 58, TrueNAT hmanga hmuh mi pariat leh RAT hmanga hmuh mi 417 an ni. Inrinni khan mi 463 hmuh chhuah niin, mipa 215 leh hmeichhia 248 an ni a; ZMC-a hmuh mi 73, TrueNAT-a hmuh 45 leh RAT-a hmuh 345 an ni.

Thla kal mek, July thla ni 17 chhungin hripui vei mi 6,661 hmuh chhuah a ni tawh a, chawhrualin ni tin mi 391 chuang (391.82) hmuh chhuah an awm ziah ang a ni.

IDSP record angin, Mizoramah Covid-19 vei mi 27,153 hmuh chhuah a ni tawh a, mipa 15,016 leh hmeichhia 12,137 an ni. Nimin tlai dar 5 thleng khan mi 21,226 (78.17%) chhuahtir an ni tawh a, mi 122 (0.45%) thi tawhin, enkawl mek mi 5,805 (21.38%) an awm.

July 16, Zirtawpnia swab sample endik dan chu - ZMC laboratory-ah 1,364, TrueNAT hmangin district 10-ah 327 leh RAT hmangin district 11-ah 3,335 a ni a, a vaiin sample 5,026 niin, chuta ṭanga hripui vei hmuh chhuah 483 chu 12.50% a tling.

Zirtawpnia district-a Covid-19 positive hmuh dan chu - Aizawl district-ah mi 279, Kolasib-ah 59, Lungleiah 52, Mamitah 36, Lawngtlaiah 28, Siahaah 27 leh Champhai leh Khaw­zawlah mi pakhat ve ve an ni.

Hripui vei hmuh thar mi 483-te chu natna lang chhuak 267 leh lang lo 216 an ni a; tualchhunga kái 482 leh state páwn aṭanga lut pakhat niin, tualchhunga kái zingah kàina chin hriat loh mi 169 an awm. Mi 483 zingah naupang kum tling lo 150 chuang telin, an zinga 60 chuangin symptom an nei a; nausén kum khat tling lo pasarih awmin, a naupang ber chu kar hnih mi a ni. Kum 60 chung lam mi 40 vel awmin, a tam zawkin symptom an nei a, a upa ber chu kum 98 leh a dawttu kum 92 mi pawhin symptom an nei.

ZMC-a hmuh chhuah mi 58 zinga a tam zawk, mi 29 chu naupang kum tling lo an ni a; ZMC leh RAT hmanga hmuh chhuahte chu tualchhunga kai vek an ni. July 17, Inrinnia swab sample endik dan chu - ZMC-ah 1,364, TrueNAT hmangin district pakuaah 512 leh RAT hmangin district 11-ah 2,317 a ni a, a vaiin sample 4,679 niin, chuta ṭanga hripui vei hmuh chhuah 463 chu 9.89% a tling. Inrinnia positive percentage hi ZMC RTPCR-ah 3.94%, TrueNAT-ah 8.78% leh RAT-ah 14.88% a ni.

Inrinnia district-a Covid-19 positive hmuh dan chu - Aizawl district-ah mi 294, Lungleiah 79, Kolasib-ah 36, Mamitah 29, Lawngtlaiah 15, Siahaah panga, Champhaiah pathum, Serchhip leh Khawzawlah pakhat ve ve a ni. Hripui vei hmuh thar mi 463-te chu natna lang chhuak 231 leh lang lo 232 an ni a; tualchhunga kái 459 leh state páwn aṭanga lut pali niin, tualchhunga kái zingah kàina chin hriat loh mi 215 an awm.
Mi 463 zingah naupang kum tling lo 130 vel telin, an zinga 50 chuangin symptom an nei a; nausén kum khat tling lo paruk awmin, a naupang ber chu thla khat mi a ni. Kum 60 chung lam mi 40 vel awmin, a tam zawkin symptom an nei.

Nimin khan tlai dar 5 thlengin hripui laka fihlim tawh mi 90 chhuahtir an ni a; Aizawl district-ah mi 50, Lunglei district-ah 21, Serchhip district-ah pasarih, Lawngtlai district-ah panga, Mamit district-ah pathum leh, Champhai leh Kolasib district-ah pahnih ve ve a ni. Inrinni khan mi 307 chhuahtir an ni tawh bawk.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 7,890 hmuh chhuah a ni tawh a, TrueNAT-PCR hmangin 1,725, RAT hmangin 17,537 leh Guwahati-ah pakhat hmuh chhuah a ni tawh.

IDSP tarlan danin, July 18, 2021 thlengin Mizoramah swab sample 5,55,899 endik a ni tawh a, chu'ng aṭanga Covid-19 positive hmuh tawh zat 27,153 chu 4.88% a ni. Hripui vei hmuh tawh zinga mi 23,016 chu Mizoram chhunga kái chhâwng an ni a, mi 4,137 chu Mizoram páwn aṭanga an rawn luh hnua hmuh chhuah an ni.