Harsate sorkar sum aṭanga puih phût

Mizoram Pradesh Youth Congress Committee (MPYCC) chuan thuchhuah siamin, total lockdown puan a nih avanga harsatna tâwkte sorkar sum báwm aṭanga ṭanpui an phût thu an tarlang.

MPYCC chuan, "Lock­down avanga eizawnna buai mek, chhawmdawl ngai leh ṭanpui ngaite hi sorkarin mipui pêk khawm aṭang ni lo, a sum báwm aṭang ngeiin chhawmdawlna leh ṭanpuina tur scheme siamsak vat rawh se. Covid-19 thawh hnihna donaah Mizoram sorkar a hlawhchham avanga tun thlenga hripui léngin ziaawm lam pan loa zual lam a la pan zel hi pawi kan ti tak zet," an ti.

Sorkar chu Covid-19 dona atan total lockdown bak tih ngaihna a hre lo em ni, tia zawtin MPYCC chuan, "Sorkar hnathawk ve lote eizawnna buai vekin, April 20, 2021 aṭang khan vawiin thlengin min khàrkhip a, khirh zawka hripui dan chah nan tiin kar khat awh total lockdown a puang leh tawh a ni," an ti a; Prime Minister hoa hmarchhak chief minister-te meetingah CM Zoramthanga'n Covid-19 hluar chhana ráltlante a puh chu nuihzatthlak an tih thu an sawi.

Congress ṭhalaite chuan, sumdawng leh ni tina eichawp zawngte tan sorkarin chhawmdawlna tur scheme, harsat zualna sutkianna tur a siam a ṭul hle tih an tarlang a, "Sorkar zém zen ve lote tan sorkar hian thlamuanpui tham tur ruahman a la nei lo. Mi harsa leh ṭanpui ngaite chu artê a puiin a kal bosan ang mai an ni," an ti.