Myanmar sipai leh hel pawl inkahna avanga raltlan an tlem tial tial - DIG

Myanmar sipai leh hel pawl Arakan Army inkah vanga Mizorama ráltlân zat chu an tlem tial tial. Vanglaini palai zawhna chhangin Police DIG (Southern Range) Joseph Lalchhuana chuan, international boundary venhim hna chu Mizoram police mawhphurhna a nih loh thu a sawi.

DIG (SR) hnen aṭanga thu dawn danin, Myanmar leh Mizoram inrinia bulah hian Myanmar huam chhungah Rakhine state a awm a, chu state-ah chuan Arakanese leh Rohingya-te an cheng. Rohingya ho awmnaa kal turin Myanmar sipaite'n Arakan an paltlang a ngai a; Arakan-te hian inlâk hran an duh avangin, October 2017 vel aṭang khan Arakan Army leh Myanmar sipaite chu an inkâp ṭan a ni.

Inkahna a thlen avang hian Arakan chhunga mite chuan an sahimna zawngin an awmna aṭanga Mizoram khaw hnai deuhte an pan hlawm. December 4, 2017-a DIG (SR)-in a tlawh lai chuan Myanmar raltlan hi Dumzautlangah mi 240, Laitlangah 443, Hmawngbuchhuahah 502 leh Zochachhuahah 397 an awm a, an vaiin mi 1,582 an ni.

Laitlang hi Myanmar sipai leh Arakan Army-te inkahna hmun hnaih a ni a, hei vang hian silai mu léng vel dawn palh hlauh thil thuah Laitlanga ráltlante chu Dumzautlang, Hmangbuchhuah leh Zochachhuahah sawn an ni. Khaw pathumah hian Lawngtlai SP-in a tlawh lai, January 5, 2018 khan ráltlan mi 1,440 an awm.

Joseph Lalchhuana chuan, international boundary venhim hna chu Mizoram police mawhphurhna a nih loh thu sawiin, "Central subject a ni a, va inrawlh ngawt theih a ni lo. Mizorama international boundary venhim hna hi Bangladesh nena ramri chu BSF kutah a awm a, Myanmar nena ramri chu Assam Rifles kutah a awm," a ti.

Assam Rifles leh Mizoram police-te'n thawhhona ṭha tak an neih thu sawiin DIG chuan, "Tun hnaia buaina thleng avang hian Assam Rifles-te'n ramhnuaiah rahpuah bomb an zawng a, eng emaw zat an hmu chhuak a ni," a ti a; ramri venhim a nih theihna atan Assam Rifles-te'n theihtawp an chhuah thu a sawi.

Police DIG chuan, ramri venhim hna chu police kut ni lo mah se, raltlante himna atan theihtawp an chhuah tih sawiin, "Raltlan Mizorama rawn lutte himna hi kan kutah a awm a, theihtawpin an himna tur kan ngaihtuah. Raltlante inkara harsatna awm tur pawh kan veng a ni," a ti.

Myanmar army leh Arakan Army inkah avangin ramri hnaiah awm khuate an rálmuang lo hlea sawi a ni a, tawhsual tâwk pawh an awm zauh zauh a, mi pakhatin a thih phah tawh a ni.

November 2017 khan Tuichawtlang khaw mi Robichondro (20) chu silaiin kah fuh a ni a, January 12, 2018-ah Sabualtlang khaw mi Monodo (67) pawh Myanmar sipaite'n hel emaw tiin an kap fuh a, a hliam. January 15, 2018 zing dar 8 velah Jitua Tongchangya (26), Burdukbanga, Lawngtlai district chuan an ramkalnaah bomb a rap puak a, hliam tuarin, damdawi-inah enkawl a ni.

January 18, 2018 zing dar 8 vel khan Lawng­tlai aṭanga khawthlang lama Kawn­khaw mi Khusoma (37) w/o Nbauh Krauhha chuan bomb a rap puak bawk a, na taka hliamin, a tuk zing dar 9:30 velah a hliam tuar loin a thi a ni.