Private hospital-a thisen pek chhuahah Lab.Technician-te'n honorarium lâk tum

Mizoram Government Medical Laboratory Techni­cian Asso­ciation (MGMLTA) chuan, sorkar damdawi-in, blood bank awmna aṭanga private hospital-an hman tur thisen an pek chhuahah kut hah man (honorarium) lak tumin ruahmanna an siam a; a taka an kalpui hun tur erawh an la sawi thei lo.

MGMLTA hruaitute'n press mite an hrilh danin, July-December 2017 chhung khan Aizawl Civil Hospital (ACH)-in thisen an pek chhuah unit 12,331 zinga 5,667 chu private hospital-ah an pe chhuak a, unit 6,664 chu sorkar damdawi-inah hman a ni.

Hei vang hian, ACH blood bank staff-te'n an thawhna ni miah lo, private commercial hospital tan an hna pangngai zat deuh thaw hna an thawk niin an sawi.

Private hospital tana thisen pek chhuah kawngah sorkar aṭangin thuchhuak a awm lo chungin, hemi chungchang Aizawl leh district hospital hrang hrang tan phurrit a ni tih an sawi a, "Kum 1992-ah Greenwood Hospital hnenah thisen kan pe ṭan a, tunah hian Aizawla private hospital 15-in hunbi nei miah loin min ban buai mek a. Kum 25 chhung chu private hospital tan hlawh nei loin kan thawk tawh a ni," an ti.

MGMLTA hruaitute chuan, an pawl chuan an­mahni ruaitu sorkar dam­dawi-ina an hna bak chu khawih tawh lo ṭha an ti tih sawiin, "Chutih rualin, Synod Hospital-ah bak blood bank dang a awm rih loh avang leh, damlote'n harsatna an tawh lutuk loh nan private hospital-a thisen pek hi la kalpui ni se, kut hah man (honorarium) lak tawh ni se kan ti ta a ni," an ti a; honorarium chu thisen unit khatah Rs. 100 zel lak an rêl tih an sawi.

MGMLTA hian private hos­pital-a hman tur thisen pek chhuaha honorarium lak an rêl hi an hman ṭan hun tur an la sawi thei lo a, departmnent hotute la sawipui leh phawt an tum a ni.