KHAWTHLIR
Thisen pe
Zirtiri Residential Science College NSS chuan, nimin khan an college-ah blood donation camp an huaihawt a, mipa 67 leh hmeichhia pariatte'n Aizawl Civil Hospital tan thisen unit 75 an pe.
City Hospital
Mission Veng, Aizawla mimal damdawi-in din thar, City Hospital chu nimin khan Pathian hnena hlanna neih a ni a, a takin kalpui ṭan a ni. City Hospital-ah hian doctor super specialist-te leh specialist-te an awm dawn a, eng lai pawhin doctor râwn turin an awm dawn a ni.
YMA lawm
YMA Sub-Headquarters, Serchhip hnuaia Vigilance & Monitoring Committee chuan thuchhuah siamin, an ngenna ngai pawimawha PWD (Highways)-in Serchhip khawpui chhung kawngpui thawm ṭhat hna an thawk ṭan ta chu lawmawm an tih thu an tarlang.
Heroin man
Excise & Narcotics department-a Anti-Narcotics Squad chuan January 30 leh 31 khan hmun pathumah heroin gram 132 leh a neitua puh, Lalngura (38) s/o Lalseia, Champhai Zotlang nia inchhál an man. Lalngura puitu leh a thurualpui, Ramhlunsanga (32) s/o Lalzawmliana, Durtlang North nia inchhál chu an man tel bawk.
MBKHP khawmpui
Mizoram Baptist Kohhran Hmeichhe Pawl (MBKHP) inkhawmpui chu nizan khan Lunglei Lunglawn muala pandal-ah ṭan a ni a, Pathianni zanah a ṭiak ang. Nizan khan palai lawmna inkhawm hman a ni a, vawiinah Lunglawn East biak-inah rorel inkhawm neih a ni ang.