July 13-ah college luh ṭan rawt

Higher & Technical Education minister Dr R Lalthangliana hoin nimin khan a pisaah Covid-19 vanga college leh university khâr mekte hawn leh hun tur leh exam buatsaih hun tur sawiho a ni a; boruak danglam a awm loh a, sorkarin rem a tih chuan July 13, 2020-ah college luh ṭan ni se, an ti.

Meeting-ah hian chief secretary Lalnunmawia Chuaungo, Mizoram University (MZU), School Education leh Higher & Technical Education department hotute an tel a; MZU registrar Prof. Lalnundanga leh controller of exams Prof. Lalnuntluanga ten MZU-in revised academic calendar an duan leh rawtte an sawi.

Under graduate leh professional course-a semester hrang hrang exam dan tur ruahmanna duan te, semester II leh IV zirlaite semester III leh V-a an kai dan tura UGC-in thurâwn a pek te, Mizoram páwna awm mek zirlaite lo kîr huna exam chungchanga harsatna awm thei te, zirna-in tam tak quarantine centre-a hman mek a nih avanga harsatna awm theite an sawiho a ni. Exam hun turah, final year zirlaite chu an kal zelna tur a khaihlak loh nan ngaih pawimawh hmasak ni se, an ti.

Meeting chuan, MZU ruahmanna chu ṭha an ti a, college hawn leh hun tur rawtna chu State Disaster Management Authority hnuaia State Executive Committee-in an pawmpui turin an thlen zui ang. 

School Education secretary Esther Lalruat­kimi chuan, pawl 12 zirlaite chu college kai chho tur an nih avangin anmahni hmakhaw ngaia college ṭan hun tur ruat ṭha a tih thu a sawi. Ruahman dan chuan, under graduate semester I chu August 20, 2020 velah ṭan beisei a ni. Meeting chuan, college ṭan ni atana an rawt chu hripui boruak azirin thlak theih a nih thu an tarlang.

Under graduate semester-VI (final se­mester) exam leh pro­fessional course (LLB, BCA, MCA leh BBA) semester II, IV, VI leh VIII-te exam ṭan hun atan July 20, 2020 an ruahman a; B.Ed, M.Ed, M.Pharm (semester IV tel loin), B.Bharm, B.Ed (Spl), B.Sc. (MLT), B.Optometry, B.Sc. (RIT), BSW leh B.Sc. (Nursing)) semester II, IV, VI, VIII-te exam ṭan hun atan August 17, 2020 an ruahman bawk.

RIPANS-ah Mizoram páwn lam mi hnam dang zirlai 300 vel leh MZU-ah state páwn aṭangin zirlai 500 vel an awm a; chu'ng mite chuan harsatna an tawh loh nan exam hun hi ruahman a nih thu MZU hotute chuan an sawi.

UGC Advisory chuan, intermediate semester-te tan exam buatsaih loa an internal assessment leh semester hmasa result-te a zatvea lain, semester an kai chhoh nan gra­ding siam a rawt a, mahse, hemi chung­changa thutawp siam turin UGC chuan university-te thuneihna a pe thung.

Meeting-a tarlan dan­in, Ministry of Human Resource Development-in central university 40 chuangte chu an revised academic calendar thawn turin a ti a, MZU chuan a thawn tawh a ni.