YMA leh MZP-in kawng enfiah

West Phaileng Joint YMA leh MZP Sub-Headquarters hruaitute chuan nimin khan Dapchhuah leh West Phaileng inkar kawng siam mek vanga kawng chhe lutuk leh lirthei táng hnuh chhuah vanga sum indil awm ṭhin avangin kawng siam mek chu a hmunah an enfiah.

Pawl pahnihte thuchhuah tarlan danin, Dapchhuah leh West Phaileng inkar kawng hi Ratna Infrastructure Projects Pvt. Ltd.-in an enkawl mek a ni a, Dapchhuah daiah metre 300 vela thui hnathawh mek a awm a, West Phaileng tawn tirhah kawng chhe zual lai a awm bawk. Kawng siam lai bakah, kawng chhe zual laiahte lirthei a táng ṭhin a, lirthei táng hnuh chhuah avangin a hnûk chhuaktute'n sum an lo dil ṭhin a ni.

West Phaileng YMA leh MZP hruaitute chuan Ratna Infrastructure Project Deputy Project Manager an kâwm a; Manager chuan, a ṭha thei ang bera an thawh tur thu a lo tiam a, lirthei táng hnuh chhuahnaah sum indil ṭhin an awm leh awm loh erawh a hriatpui loh thu a sawi.

YMA leh MZP hruaitute chuan, tun hnuah chuan, kawng chu Ratna Infrastructure Project enkawl lai a nih angin, lirtheite'n harsatna an tâwk a nih pawhin, sum phût buai loa lo ṭanpui ṭhin turin an hrilh a; lirthei táng hnuh chhuah man pawisa an lo chawitir tawhte pawh chhui chhuaka pawisa pe kîr leh turin an hrilh rualin, puih an ngaihnaah chuan pui tura an inhuam thu an sawi bawk.