Insawisel ringawtin ram a siam ṭha lo Ram siam turin mipui ṭanrual a ngai- Vanneihtluanga

Ṭangrual pawl - Zoram People's Movement (ZPM) chuan nimin khan an pisaah chhung inkhawm an hmang a; Lengzem editor Vanneihtluanga'n thu sawiin, insawisel ringawtin ram a siamṭhat loh thu leh, Mizoram hi siamṭhat ngaia hria zawng zawngte ṭanrual hun a nih thu a sawi.

Inkhawm hi MPC vice president Vanlalhlana'n a kaihruai a; Vanneihtluanga chuan, Mizote chu politics huang chhungah insawisel an thiam hle tih sawiin, "Insawisel ringawt hi ram siam ṭhatna hmanrua a tling lo. Fel lohna nei vek kan ni a, kan felna laiah kan ṭangrual tur a ni. Kan ṭhatna laiah inen ila, ṭha leh ṭha indawr tawnin, ram tana thil ṭha hring chhuak thei tur bera kan hriat angin vote i thlak ang u," a ti.

Vanneihtluanga chuan, minister zingah pawh sem policy aia thawhrim ṭha ti zawk an awm thu sawiin, "Kan ram leh hnam hi chhe vekah inngai lo ang u. Mi zawng zawng hi sual vekah i ngai hek lo ang u. Minister ni mek zingah pawh ram ṭhatna duh ngawih ngawih an awm a, sorkar hnathawk zinga a tam zawk hi ram ṭhatna duha tuihal, ram siamṭhat duhtute tundin duha hun remchang thlir reng an ni.Chu'ng mite chuan vote kan hma lawka inthlan hunah hian vote an thlak dawn. Keini hi ram siam ṭhat duhtua min ngaih chuan min vote ang," a ti a; Mizote zing aṭang hian ram siamṭha tur an chhuak leh dawn tih beisei turin Mizo mipuite a chah.

Ram siam ṭha turin ṭanrual a pawimawh tih sawiin Vanneih­tluanga chuan, "Kum nga sorkar tur lek hian i ṭangrual lo ang u, kan hnam chhan tur tak tak hian i

ṭangrual ang u. He ramah hian ram siam turin kan tê lo a, tuna ṭangrual pawl ngawt hi kan ni lo, ram siam duhtu an lo tel zel dawn a ni,” a ti.

Hunserh hmangtu Synod moderator kal chhuak Rev. Lalzui­thanga chuan, tuna Mizoram dinhmun thlirin, kum 20-30 a vei leh chuan ram luah tur Mizo an awm tawh loh a hlauhawm thu sawiin, "Kum 80 a vei leh chuan ram neitu Mizote hi ramri velah chep takin kan awm khawm tawh mai ang em? Kan history te hi thlak a ngai mai ang em?" a ti a; He Tangrual Pawl hi a hlawhchham leh zel chuan, bei a dawng hlen mai ang tih a hlauh thu a sawi bawk.

Rev. Lalzuithanga chuan, tu pawh sorkar se, kohhran leh tlawm­­ngai pawlte nen an ṭanrual a pawimawh thu a sawi a, "Sorkar, kohhran leh NGO ṭanho a nih loh chuan ram siamṭhat theih a ni ngai lo ang. Sorkar a mal kal a nih chuan remna leh muanna leh hmasawnna tluantling a awmin ka ring lo," a ti.