MLA nih vangin an candidate kher lo ang - Lal Thanhawla

MPCC president Lal Thanhawla chuan, Congress party mi MLA ni mekte chu kumina inthlan lo awm turah MLA candidate an ni dawn nge dawn lo a chiang lo, tih a sawi.

Congress Bhavan-a nimina a thusawinaah Lal Thanhawla chuan, an party mite chu bial lo ena vil ve ngawt lo tura chahin, "Chutih rualin, MLA ding lai kan nih vang ngawtin ding leh ngei ngei tur kan ni chuang lo," a ti a; an party hruaitute rawt leh ruat apiang MLA candidate an nih tur thu a sawi.

Tripura refugee camp-a Bru-te chu an party-ah lawm luh an tum thu a sawi a, "Harsatna eng emaw avangin kan lawm lut lo," a ti.

Ningania Zawlnuam an tlawh ṭumin Tripura refugee camp-a Bru 2,000 vel lawm luh an tum thu an sawi a, "Tripura sorkar lamin an curfew hnan a, heti chung hian kal luih tum an awm tho a ni," a ti a; Tripura sorkarin a kal lui chu ration card tihtawpsaka a vau avangin an lawm lut thei ta lo niin a sawi.

Congress party vanneihna chu, an worker-te leh party hruaitute party danga mite aiin an ṭha nia sawiin MPCC President chuan, "MNF-te'n he sorkar hi sawichhiatna tur an hre lo. ‘Nuamtawl sorkar’ an ti mai mai ṭhin a, ramhnuaia vai sipai hlaua khawsa ṭhin tan chuan nuam hi a tam em a, muangleia an nupui fanaute bula an mu ringawt pawh hi an tan chuan nuam tâwl vek a ni," a ti.