Blood donation-a harsatna sukiang turin Sorkarin hma a la mek - Health Minister

Association for Voluntary Blood Donation (AVBD) chuan nimin khan Aizawl Civil Hospital (ACH) Confe­rence Hall-ah ‘State level training on voluntary blood donation’ an buatsaih a, Health minister Lal Thanzara'n a hmanpui. Minister chuan, blood bank-a thawktu indaih loh vanga donation camp buatsaih kawnga harsatna awm ṭhin sukiang turin sorkarin hma a lak mek thu a sawi.

Inkhawm hi AVBD president PC Lalhmingthanga'n a kaihruai a; Health Minister chuan, AVBD-in state pum huapa a thlawna thisen pek chung­chang inzirtirna hun an buatsaih chu lawmawm a tih thu sawiin, "Mi dang ṭhatna tur ngaihtuahtu pawl AVBD hi mipuite'n kan ngaihhlut a, an hna­thawh leh hmalaknate kan ṭawiawm ṭhin a pawimawh," a ti.

Lal Thanzara chuan, a thlawna thisen pek ṭan hun, kum 1993-ah chuan a thlawna thisen pek zat chu 1.79% chauh a ni tih sawiin, tunah erawh chuan 80% chung lam a ni tawh tih a sawi a; pawl hrang hrangin thisen pek an uar zel chu lawmawm a tih thu sawiin, "Thisen mamawhna a san ve zel avangin ṭan lâk zual zel a ngai a, tumah kan rálbáng thei lo a, a petu kan pun zel a ngai," a ti a, thisen pe theite chu lawm nacháng hre turin a chah.

Blood bank-a thawktute indaih loh vanga thisen pe duhte'n an duh anga an pe thei lo ṭhin chu pawi a tih thu sawiin Lal Thanzara chuan, "Technician leh doctor indaih lohna vangin thisen pek kawngah duhthu a sâm thei lo tih kan hria a, chinfel tumin sorkarin hma a la mek a ni," a ti a; thawktu indaih loh vanga thisen pek tumte'n harsatna an tawhnaah ngaihdam a dil a ni.

Health Minister chuan, thisen pe turin taksa leh nunphung hrisel neih a ngaih thu sawiin, nun vawn uluk leh ruih theih thil laka fihlim a pawimawh thu a sawi a; donation camp aṭang ringawt chuan thisen mamawh phuhrûk theih a ni lo tih sawiin, "State dangah chuan thisen vawi 100 aia tam pe tam tak an awm a, Mizoramah pawh ṭhalai rual zingah a tam thei ang ber regular blood donor, thla thum dana thisen zat zat pe ṭhin tam zawk kan neih a pawimawh a ni," a ti.

Training-ah hian chawhma lamah Synod Hospital-a blood bank officer Dr B Lalnunthari'n 'Basic Blood Science & Do­nation Criteria' tih thupui a sawi a, Lung­lei Civil Hos­pital-a blood bank officer Dr ST Lalhriatpuii'n 'Principles of Donor Motivation and Techniques' tih thupui a sawi.

Chawhnuah AVBD general secretary C Lalnunnema'n 'Concept of Voluntary Blood Donation & VBD Movement' tih leh Central KṬP general secretary hlui Lalrinmuana'n 'Christianity and Voluntary Blood Donation' tihte an sawi bawk.

Training-ah hian YMA hruaitu te, kohhran hrang hrang ṭhalai pawl hruaitu te, NSS programme officer-te leh district-a AVBD hruaitute an tel a; sawihona leh zawhna leh chhanna hun hman a ni.

Report-a a lan danin, April-De­cember 2017 chhung khan Mizorama blood bank 10-te'n donation camp vawi 346 an nei a, chutah chuan mi 12,918-in thisen an pe a ni. Blood bank-a kala thisen pe (individual donor)mi 3,400 an awm bawk.