KHAWTHLIR

MNF inkhawm
MNF party chuan nimin khan Mizo Hnam Rûnah inkhawm an buatsaih a; AMC-a councillor Laltlanzova Khiangte-in January 17-18, 2018 chhunga Chicago, USA-a khawvel huap 2nd. Annual Smart City Symposium and Exhibition-a an tel thu a sawi bakah, MNF SEDP Drafting Committee member K Lalsawmzuala'n SEDP chungchang a sawifiah.

AR hotu kâwm
Mizo Students’ Union (MSU) general headquarters hruaitute chuan an president RB Lalmalsawma hoin nimin khan Assam Rifles 23 Sector DIG Brig. MS Mokha an kawm a; Mizo ṭhalai a tam thei ang ber Assam Rifles-a an ṭan theih dan tur te, National Defence Academy-a Mizo an luh tam leh zual theih nana free coaching leh training kalpui dan turte leh thil dangte an sawipui.

NLUP sem
AH&Vety department chuan nimin khan Vety Complex, Lungleiah NLUP hnuaia vawk vulh thlangtu chhungkaw 553 hnenah ṭanpuina an sem a, Lunglei High Powered Committee vice chairman S Laldingliana, MLA-in a hmanpui. Ṭanpuina hi hmanraw leina atan Rs. 3,378 ṭheuh pek an ni.

Rural haat hawng
NABARD leh Dap­chhuah V/C ṭangkawpin Rs. 10,36,000 sênga Dapchhuah Rural Haat an sak chu nimin khan Mamit DC Lalbiaksangi'n a hawng. Rural Haat-ah hian chawhmeh zawrhna seat 24 siam a ni a, February 5, Thawhṭanni aṭangin an ṭhu ṭan dawn a ni.

Secretary-in enfiah
GAD secretary Zothankhuma chuan February 1, Ningani khan Sangau SDO(C) office leh quarters-te a tlawh a, a dinhmun a enfiah. Sangau SDO(C) hi kum 20 dáwn quarters leh office-te luahlum a nih loh bakah, a takin SDO(C) leh thawktute an awm ngai lo a, Sangaua BDO awmte chuan SDO(C) hna an hmui ṭhin a ni. GAD Secretary-in a enfiah hnu hian hmalak dan sorkarin a ngaihtuah dawn nia sawi a ni.