Online-a thil sual tite laka fimkhur turin chah

Mizoram Police-a public relations officer (PRO) chuan thuchhuah siamin, internet online hmanga thil sual ti ṭhinte lakah fimkhur turin mipui a chah.

Police thuchhuah chuan, mi tu emaw bank account-ah pawisa thawn sual anga insawi an awm ṭhin tih sawiin, "Hei hi inbumna chi khat leh sum tak tak chàn theihna a nih theih avangin fimkhur hle tur. I account aṭangin pawisa chu i thawn let leh mai tur a ni lo a, a thawn sualtu zawkin bank-ah report thehlutin hma a la zawk tur a ni," a ti.

Police tarlan danin, tun hnai khan mi pakhat chuan a bank account-ah Rs. 82,000 a in thun lut (deposit) tih SMS a dawng a, mahse, reference number J002 tih bak a deposit-tu a hriat a ni lo. Chumi hnuah phone call a dawng a, Revenue department aṭanga bia anga insawiin, tihpalh thil thuin bank account-ah VAT Return Rs. 82,000 an thun thu leh a reference number pawh J002 a nih thu a sawi. Pawisa pawh chu TLB Towers ta tur a nih avangin thawn let turin a rawn ngen nghal a, a rawn betu chuan official letter ni âwm tak, a thawn letna tur bank detail-te fax hmangin a thawn nghal a ni.

SMS leh phone call dawngtu chuan pawisa chu thawn let leh a tum a, Rs. 82,000 chu a bank account-ah a lut ngei tih a finfiah hmasa a, mahse, 'UNCLEAR' a ni tih a hmuchhuak hlauh a ni. A rinhlelh avangin pawisa chu thawn kîr nghal loin, bank hotute a bia a, bank lam chuan an risk/fraud division lam an kawhhmuh a, inbumna thil a nih thu an hre ta a ni.