BJP-in hma kan sawn hle - JV Hluna

BJP, Mizoram Pradesh president Prof. JV Hluna chuan, Mizoramah BJP-in hma a sâwn hle niin a sawi a, "Khaw hrang hrangah unit thar kan neih belh zel a, a lawmawm hle a ni," a ti.

Nimina BJP pisaa inkhawmah Prof. JV Hluna chuan, political party ṭhenkhat chu mihring tak hmuh tur awm lo an lawm lut ṭeuh ṭhin nia sawiin, "Keini erawh chuan voter ID number nen lama an hming ziak meuha lawm luh tur kan nei reng ṭhin. India ram hi BJP sorkar chak tak leh hmasawn takin min nuai mek a ni," a ti a; BJP sorkar thlipui chuan Congress party a nuai na deuh bik a, an tlu duai duai mai niin a sawi.

JV Hluna chuan, Mizoramah pawh BJP sorkar thlipui siper a lo thleng mek nia sawiin, "Social media hrang hranga party ṭhenkhatin thu belhchian dâwl lo an thehdarh pawhin mi rilru a ti buai tawh lo a, politics-a inbeihna mai a ni tih an hre ṭan ta. BJP leh Kristianna tih lehkhabu BJP Mizoramin kan siam aṭang hian tute nge Kristian leh hnam tlem zawk ngaihsaktu party a chiang viau a ni," a ti.

Mizoram BJP President chuan, Union Finance minister Arun Jaitley-a'n Union bubget a pharh thar chu ram mipuite tan a ṭha hle niin a sawi bawk.