PRISM-in pawisa lak an duh lo

PRISM party chuan thuchhuah siamin, Mizoram Government Medical Laboratory Technician Association (MGMLTA)-in sorkar blood bank aṭanga private hospital-a hman tur thisen an pek chhuahah kut hah man (honorarium), thisen unit khat zelah Rs. 100 lak an rêl chu an duh loh tak zet thu an tarlang.

PRISM chuan, MGMLTA member-te chu sorkar hnathawk, thla tin sorkar aṭanga thawh hlawh hmu an ni tih sawiin, "Hetianga an hlawh duhkhawp lo ang maia kut hah man an beisei leh hi thil tih âwmah kan ngai lo a, a rang thei ang berin thuneitute'n chingfel thuai se kan duh hle a ni," an ti a; mi tlawmngaite thisen pek aṭanga kut hah man sum lo phût chu ṭha lo an tih thu an sawi.