Lawngtlai district-a haw ru lakah FIR thehlut
June 3, Nilaini khan state páwn aṭanga phalna la loa Mizorama lut rû leh Lawngtlai district-a haw mi pakhat lakah FIR thehluh a ni.
Sorkar thuchhuah tarlan danin, Mizorama haw rû hi Covid-19 vanga inkhàrkhip thawh thumna kalpui mek laia state pawna tangkhangte an lo haw theih dan tur sorkarin ruahmanna a siam zâwm lo leh phalna la lo a ni a, Lawngtlai Bazar Venga khawsa, truck handyman anga insawia May 15, 2020-a Silchar aṭanga Lawngtlaia haw a ni.
A rawn haw hnuah an chhungkuain khung hran an ni a, May 31, 2020 khan ina a inkhung hran hun a tàwp. Sorkar thupek zâwm loa lockdown a bawhchhiat avang leh mi tam tak dinhmun hlauhthawnawma a daha ngaih a nih avangin dan anga hmalak a nih theih nan FIR thehluh a ni.
FIR hi Lawngtlai Police Station-ah Lawngtlai SDO (Sadar) V Lalruatliana'n a thehlut a; IPC Section 188/269 leh DM Act, 2005 Section 5(b) hnuaiah June 3 khan thubuai ziah luh a ni.