Mizoramin Covid-19 atan bik Ambulance hman tur a nei lo

Mizoramah Covid-19 hripui vei hmuh chhuah belh an nih zel avangin Health & Family Welfare department chu ambulance hman tur an indaih lo hle a; Mizoramin Covid-19 atan bik ambulance (dedicated ambulance) a nei lo.

Health department hotute chuan Vanglaini zawhna chhangin, hripui vei rinhlelhte Zoram Medical College (ZMC)-a hruaina (phurhna) atan ambulance hman zel a ngaih thu an sawi a, "Heng bakah hian ambulance khera phurh chi a awm ṭhin a, ambulance indaih lohna a nasa hle. Tuna kan ambulance neihte hi Covid-19 atan bika tih a ni lo a, a him theihna atan driver leh damlo chuanna inkar ṭhelrêta ping dangin kan hmang naw naw a ni," an ti.

HFW department hotute sawi danin, ambulance 69 an nei mek a, chu'ngte chu National Ambulance Service aṭanga an dawn a ni. Ambulance zinga pasarih chu kum 2019-a dawn a ni a, a bak chu dawnna a rei deuh tawh. Siamṭhat tlak loh khawpa chhia 10 a awm bawk. Ambulance-te hi nau pai leh na neite phurhna atana tih a nih deuh ber avangin driver leh damlo 

ṭhutna pin mumal a ni lo.

Covid-19 dedicated ambulance-ah chuan driver compartment hranpa leh basic life support a awm tur a ni. Health department-in ambulance a neih mek zingah driver compartment hranpa leh basic life support a awm lo.

Mizoramah Aizawl Civil Hospital leh Lunglei Civil Hospital bâkah, district hospital paruk, community health centre 12, primary health centre 57 leh upper primary health centre eng emaw zat a awm mek a; tuna HFW department-in ambulance a neih sate chu sorkar damdawi-inah pakhat tê tê-in sem dawn pawh ni se, an indaih dawn lo a ni.