Mizoram Governor 22-na atan Hari Babu Kambhampati lak luh a ni

Nimin tlai khan Mizoram Governor thar Hari Babu Kambhampati (68) chu Raj Bhavan-ah rinawmna thu tiamtira lák luh a ni a, Mizoram Governor 22-na a ni.

Hari Babu Kambhampati hian nimin chhun khan Mizoram a rawn thleng a, Lengpui Airport-ah chief minister Zoramthanga, minister Dr R Lalthangliana, chief secretary Lalnunmawia Chuaungo, DGP SBK Singh, secretary to governor V Lalsangliana leh official dangte'n an lo hmuak. Raj Bhavan-ah deputy chief minister Tawnluia leh Home minister Lalchamliana ten an lo hmuak leh bawk.

Nimin tlai dar 4:30 khan Gauhati High Court judge Justice Michael Zothan­khuma'n Hari Babu Kambhampati chu rinawmna thu tiamtirin Mizoram Governor atan a la lut a; lak luhna inkhawmah hian Chief Minister, Dy. Chief Minister, minister te, MLA-te leh sorkar official-te an tel.

Mizoram larsap thar Hari Babu Kambhampati hi June 15, 1953-ah Chirala khua, Prakasam district, Andhra Pradesh-ah a piang a; a nupui chu Khambhampati Jayasree niin fa pahnih an nei.

Andhra University, Visakapatnam aṭangin ME (Electrical & Control Systems) a zo a, engineering-ah hian doctor of philosophy a zawh leh hnuah Andhra University-ah zirtirtu hna a thawk. University-a associate professor a nih laiin politics khel turin kum 1993 khan a hna aṭangin a báng a ni.

Hari Babu Kambhampati hi kum 1999 khan Andra Pradesh MLA atana thlan tlin a ni a, BJP Legislature Party leader a ni. Kum 2014 khan Lok Sabha MP atana thlan tlin a ni leh a, an state BJP president pawh a lo ni tawh ṭhin.

Mizoram hian union territory a nih chhung, kum 1972 aṭanga 1986 thlengin lieutenant governor panga a nei a; state a nih hnu, kum 1987 aṭangin governor 22 a nei ta a ni. Hiteswar Saikia chu lieutenant governor leh governor ni ve ve awmchhun a ni.