Vawiinah veng/khua parukah sample endik rûnpui ṭan dawn

Health department leh Medical Operation Team on Covid-19 hotute chuan Health Minister hoa rorel bawhzuiin nimin khan Aizawla swab sample endik rûnpui neih dan tur an rél. Vawiin aṭangin endik rûnpui neih ṭan tum a ni.

Ṭhutkhawm hi MOT chairman Dr ZR Thiamsanga, MLA-in a kaihruai a; an tarlan danin, vawiina sample endik rûnpui neihna turte chu - Chhinga Veng chuanhnuai, Armed Veng South, Saron Venga Khuangchera Section, Bethlehem Vengthlang, Electric Veng leh Tuirialte a ni.

July 17, Inrinni khan MOT leh Aizawl West CMO pisa chuan Chanmari West-ah sample endik rûnpui an lo kalpui tawh a ni.

Sample endik rûnpui neih tur chung­­changa Vanglaini palai zawhna chhang­in Integrated Disease Surveillance Program (IDSP) nodal officer Dr Pachuau Lalmal­sawma chuan, "LLTF-te nen ṭang­hoin test kalpui a ni dawn. Tun ṭum mass testing atan hian veng paruk thlan phawt an ni a, a tam thei ang ber test kan tum," a ti.

Dr Pachuau Lalmalsawma chuan, ni khatah veng pakhat zelah mass testing kalpui tum a nih thu sawiin, "Veng population a inang lo a, ni khata zawh hman lohte pawh a awm thei ang. Chutih rualin, ni khat tawp ngai loa zawh hmante pawh a awm thei mai thei," a ti a; veng pakhat zawh a nih hunah veng dangah a tahtawla insawn zel a nih tur thu a sawi.

IDSP Nodal Officer chuan, total lockdown kalpui mek chu pawhsei ni lo mah se, endik rûnpui kalpui zel a nih mai theih thu sawiin, "Total lockdown chhung hian a tam thei ang ber test tum a ni. Lockdown pawhsei a nih loh pawhin a ṭul dan azirin kalpui zel theih a ni ang. Veng paruk thlan phawt a ni a, a ṭul chuan kan tih belh leh mai tur a ni," a ti.

Sample endik rûnpui neih hmasakna tur vengte uluk taka thlan a nih thu sawiin Dr Lalmalsawma chuan, "Hripui vei mek an neih dan leh containment area an nih dante thlir a ni," a ti a; endik hmasakna veng thlang turin committee din a nih thu a sawi.

Dr Pachuau Lalmalsawma chuan, endik rûnpuiah a tam thei ang ber endik tum a nih thu sawiin, "Quarantine mek test la hun lo te, negative result nei hnaivaite erawh test rih loh tur a ni. Test tur hian intihluih theihna awm chiah lo mah se, positive contact-te erawh test an duh loh chuan dan hnuaiah hrem theih an ni," a ti.