COVID-19: Mizoram dinhmun : Hripui vei 335 hmuh belh a ni

July 18, Pathianni khan Mizoramah Covid-19 vei mi 335 hmuh chhuah a ni a, July thlaah mi 6,996 hmuh chhuah a ni tawh. Nimin khan hripui laka fihlim tawh mi 219 chhuahtir an ni.

Covid-19 vei hmuh tharte chu mipa 157 leh hmeichhia 178 niin, Aizawla veng 39 leh khaw dang 21-a mite an ni a; TrueNAT hmanga hmuh chhuah mi panga leh RAT hmanga hmuh chhuah mi 330 an ni. ZMC laboratory-ah swab sample endik a ni lo.

July thla ni 18 chhung­in hripui vei mi 6,996 hmuh chhuah a ni tawh a, chawhrualin ni tin mi 388 chuang (388.67) hmuh chhuah an awm ziah ang a ni. Nimin zinga positive result a chhuah hnuah enkawl lai (active case) 6,003 an awm a, a tam lai ber a ni.

IDSP record angin, Mizoramah Covid-19 vei mi 27,488 hmuh chhuah a ni tawh a, mipa 15,173 leh hmeichhia 12,315 an ni. Nimin tlai dar 5 thleng khan mi 21,582 (78.51%) chhuahtir an ni tawh a, mi 123 (0.45%) thi tawhin, enkawl mek mi 5,783 (21.04%) an awm.

July 18, Pathiannia swab sample endik dan chu - TrueNAT hmangin Lunglei, Siaha leh Lawngtlaiah 69 leh RAT hmangin district pariatah 1,270 a ni a, a vaiin sample 1,339 (mipa 783, hmeichhia 556) niin, chuta ṭanga hripui vei hmuh chhuah 335 chu 25.02% a tling. Positive percentage hi TrueNAT-ah 7.24% leh RAT-ah 25.98% a ni a; mipaah 20.05% leh 32.01% a ni.

Pathiannia district-a Covid-19 positive hmuh dan chu - Aizawl district-ah mi 201, Lungleiah 82, Kolasib-ah 18, Mamitah 16, Lawngtlaiah pakua, Siahaah pariat leh Champhaiah pakhat a ni. Hripui vei hmuh thar mi 335-te chu natna lang chhuak 287 (85.97%) leh lang lo 48 an ni a; tualchhunga kái vek niin, kàina chin hriat loh mi 126 an awm.

TrueNAT hmanga hmuh chhuahte chu symptom nei lo vek an ni a, hri kàina chin hriat loh pakhat a tel. RAT hmanga hmuh chhuah mi 330-te chu symptom nei 288 leh nei lo 42 an ni a, mi 120 chu hri kàina chin hriat loh an ni. Mi 335 zingah naupang kum tling lo 100 vel telin, an zinga a tam ber, mi 80 chuangin symptom an nei a; nausén kum khat tling lo panga an awm. Kum 60 chung lam mi 20 chuang an awm a, symptom nei 20 awmin, chu'ng zingah chuan a upa ber kum 99 mi pawh a tel.

Nimin khan tlai dar 5 thlengin hripui laka fihlim tawh mi 219 chhuahtir an ni a; Aizawl district-ah mi 79, Lunglei district-ah 56, Kolasib district-ah 34, Mamit district-ah 32, Champhai district-ah 10, Serchhip district-ah panga, Saitual district-ah pahnih leh Hnahthial district-ah mi pakhat an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 7,890 hmuh chhuah a ni tawh a, TrueNAT-PCR hmangin 1,730, RAT hmangin 17,867 leh Guwahati-ah pakhat hmuh chhuah a ni tawh.

IDSP tarlan danin, July 18, 2021 thlengin Mizoramah swab sample 5,57,238 endik a ni tawh a, chu'ng aṭanga Covid-19 positive hmuh tawh zat 27,488 chu 4.93% a ni. Hripui vei hmuh tawh zinga mi 23,351 chu Mizoram chhunga kái chhâwng an ni a, mi 4,137 chu Mizoram páwn aṭanga an rawn luh hnua hmuh chhuah an ni.