KHAWTHLIR

DC-in ngen
Aizawl DC chuan Civil Hospital, Aizawl Medical Superintendent leh Non-Governmental Hospital Association of Mizoram President-te chu total lockdown chhungin dam lo inenkawlna mamawh (medical emergency) te enkawl an nih theih nan ruahmanna siam turin a ngen. Lockdown chhung hian medical lama thawkte an inralrin reng a ṭul dawn thu tarlangin DC chuan, "Hemi hun chhung hian doctor-te chu phone leh inbiakpawhna danga mipui rawn theih tura awm reng tura ngen an ni," a ti.

PE Secretary-in Chuhvel a tlawh
Power & Electricity secretary H Lalengmawia chuan tun hnai khan Mizoram leh Assam-in buaina a neihna hmun Chuhvel ram a tlawh a, police-te chu an harsatna leh mamawhte a sawipui. Police camp-a power supply pek dan tur a enfiah a, a rang theih ang bera tihhlawhtlin a nih theih nan hma la nghal turin thawktute a hrilh a ni.

Restricted area hlîp
Aizawl DC chuan, thawktute zingah Covid-19 vei an awm avanga Trinity Hospital, Melthum (Silaimual) leh a chhehvel restricted area-a puan tawh chu nimin khan a hlîp. Trinity Hospital-ah hian Covid-19 positive pakhat chiah a awm tawh a ni.

Leimin enfiah
MLA VL Zaithanzama chuan nimin khan a bial, Aizawl West-III huam chhunga lei minna hmun hrang hrang a tlawh kual a, leiminin harsatna a thlen dante khawtlang hruaitute nen an enho. Pathianni zana ruahsur nasa avangin Mission Vengthlang YMA Hall bul lungrem a chim a, Mission Vengthlang leh Khatla South inrina Tlawng road pawh leiminin a hnawh. MLA hian Bungkawn Vengthar leh Maubawka leiminte a hmunah a enfiah bawk.

Containment hlîp
Aizawl DC Dr Lalhriatzuali Ralte chuan Republic Vengthlanga containment zone-a puan tawh, chhungkaw 21 awmna chu nimin khan a hlîp.