Ramri vengtu police-te mamawh Ngaihtuah chak turin MZP-in sorkar ngen

MZP hruaitute chuan an president B Vanlaltana hoin July 17, Inrinni khan Chuhvel rama Mizoram leh Assam inrìna leh inepna hmun an tlawh a; police duty-te mamawh chak zawka ngaihtuah turin Mizoram sorkar an ngen.

MZP chuan thuchhuah siamin, ramria duty-te ma­mawh hmasa - kawng, tui leh kawlphethate an neih theih nan chak taka hma la turin Mizoram sorkar an ngen a, "Assam lamin thapui thawha min nêk lai hian inthlahdah lo a, ramri ven him kawngah ṭhahnemngai lehzuala che turin Mizoram sorkar kan beisei," an ti.

MZP tarlan danin, Chuhvel rama Mizo police inkulhna chu Bairabi-Chuhvel kawngpui aṭangin km. 3 vela hlá a ni a, kawng a ṭha lo hle. Hnang luiah lei dawh a nih loh chuan lirthei pangngai tan lui kân theih a nih loh bakah, ke-in km. khat chuang kal a ngai. Police inkhuarna hmunah tui a harsa a, tui a harsat avangin km. khat chuanga hláah eirawngbàwl a ngai a, kawlphetha a awm lo bawk.

Assam lamin kawng an lài chak viau tih sawiin MZP chuan, "Mizo police-te inkhuarna aṭangin an kawng lâi thâwm hriat phak a ni hial tawh. Lirtheia ramri tlân thleng zung zung thei turin hma an la chak hle. Mizoram lam aṭanga kawng laih erawh a chak tâwk lo," an ti a; Mizoram sokar chu chak zawka kawng sial turin an ngen.

MZP chuan, ramri venhim a nih theih nan ngaihtuahna thar nei a, ṭhahnemngai lehzual turin Mizo mipui an ngen a, "Ramri venghim tura rammu mekte mamawh phuhrûk a nih theih nan leh sorkar thâ tichak lehzual tura luan chhuah uar turin Mizo mipui kan sáwmin, kan ngen tak meuh a ni," an ti.

Assam nen ramri chung­changa innawrnaah Mizoram sorkarin a phâk tâwkah ṭhahnem a ngaiin, tih ṭhat tam tak a nei tih an hriat thu tarlangin MZP chuan, inthlahdah loa ram leh hnam chhan turin thapui thawh zel turin an ngen nghal a; an ngen tawh anga a hmunah Mizoram IGP-in a tlawh kual chu lawmawm an tih thu an tarlang bawk.